Hræringar vestra valda nokkrum ugg

„Í meginatriðum er staðan ekki mikið breytt frá því í lok apríl,“ sagði Arnór Sighvatsson aðstoðarseðlabankastjóri á fundi í Seðlabankanum í morgun þar sem kynnt var ritið Fjármálastöðugleiki 2013. Ritið kemur út tvisvar á ári og er þetta seinni útgáfa ársins.

Arnór sagði fjármálakerfið um þessar mundir búa yfir umtalsverðum viðnámsþrótti, sem hafi farið vaxandi og auðveldi fjármálafyrirtækjum að mæta áhættu sem steðja muni að fjármálakerfinu á næstu árum.

„Helstu styrkleikar kerfisins felast í háum eiginfjárhlutföllum kerfislega mikilvægra fjármálafyrirtækja og þau hafa hækkað það sem af er ári.

Dregið hefur úr vanskilum í bankakerfinu og endurskipulagningu útlána miðar áfram,“ segir Arnór og bendir um leið á að lausafjárstaða bankanna sé vel yfir þeim mörkum sem sett hafa verið af Seðlabankanum og Fjármálaeftirlitinu.

„Þá hefur efnahagsbati innanlands haldið áfram og hagvöxtur er einnig tekinn að glæðast í helstu viðskiptalöndum, þar á meðal Evrópu, sem vegur þyngst í viðskiptum Íslands.“ Því megi segja að áhætta í umhverfi fjármálafyrirtækja fari almennt minnkandi. „Þótt hræringar í Bandaríkjunum nýlega valdi nokkrum ugg,“ bætir hann við.

Um leið segir Arnór í inngangi sínum að riti Seðlabankans að þótt staða fjármálafyrirtækjanna sé almennt sterk, sé mikilvægt að missa ekki sjónar á áhættu sem enn sé til staðar. 

„Fjármagnshöftin búa fjármálafyrirtækjum á vissan hátt verndað starfsumhverfi, þótt þau eyði ekki endurfjármögnunaráhættu erlendra lána.“ 

Þá ýti höftin til lengri tíma undir ákveðnar tegundir áhættu, til dæmis með því að brengla eignaverð. „Þegar höftin verða losuð mun þessi áhætta koma fram í dagsljósið, með mögulegum áhrifum á efnahagsreikning bankanna.“

Eins verði ekki fram hjá því horft að vanskil séu enn mikil, þótt verulega hafi dregið úr þeim. „Í ljósi þungrar skuldastöðu stórs hóps fyrirtækja og heimila gætu vanskil aukist á ný verði efnahagslífið fyrir áföllum. Í auknum mæli hefur verið tekið á vanda skuldsettra fyrirtækja með lánalengingum, sem óvíst er að dugi til.“