Er þetta ekki hámark lágkúrunnar?

Nú er að hefjast heimsmeistarakeppi í handbolta og eru talsverðar væntingar hjá Íslendingum um góðan árangur. Það má segja að handbolti sé þjóðaríþrótt Íslendinga og því mikill almennur áhugi fyrir gengi landsliðsins okkar.

En nú bregður svo við að RÚV (útvarp allra landsmanna) hefur ekki séð sér fært að tryggja sér sýningarrétt á leikjunum og verða þeir sýndir á lokaðri rás Stöðvar 2 Sport. Þetta er slík lágkúra að erfitt er að sætta sig við þetta, sérstaklega í ljósi skylduáskriftar að RÚV. Það ætti að vera sjálfgefið að RÚV sýndi alla leiki íslenskra landsliða, í opinni dagskrá, sem allir landsmenn gætu notið.

Það er svo annað mál að það væri ekki úr vegi að RÚV, Stöð 2 og e.t.v. aðrar stöðvar sameinuðust um að sýna þessa leiki í opinni dagsskrá og skiptu með sér kostnaði, skiptir þá litlu á hvaða sjónvarpstöð leikirnir væru sýndir hverju sinni.

Að skylmast um sýningarréttinn og yfirbjóða hver annan er ekki leiðin. Heldur ættu íslenskar sjónvarpsstöðvar að komast að samkomulagi um að bjóða til skiptis í svona viðburði sem yrðu alltaf sýndir í opinni dagskrá og samkomulag um sýningu fyrir fram ákveðið hverju sinni.

Ég hygg að, að öllu óbreyttu, verði landsleikir áfram sýndir í lokaðri dagskrá muni áhugi landsmanna smám saman minnka fyrir þessari íþrótt, sem er mjög slæmt fyrir æsku þessa lands sem þarf á góðri fyrirmynd að halda.