Hvernig eru strákarnir okkar að standa sig í Þýskalandi?

Fjöldi íslenskra handknattleiksmanna spilar í efstu deild Þýskalands og okkar menn hafa oftar en ekki verið á meðal markahæstu manna deildarinnar. Svo er ekki lengur.

Hornamaðurinn Bjarki Már Elísson er markahæstur Íslendinganna í Bundesligunni. Hann er í 23. sæti yfir markahæstu menn með 63 mörk í vetur.

Hann er að skora 4,3 mörk að meðaltali í leik. Nær helmingur marka Bjarka kemur úr hraðaupphlaupum. Hann er búinn að skora 30 hraðaupphlaupsmörk í deildinni eða mest allra.

Guðjón Valur Sigurðsson, leikmaður Kiel, er oftar en ekki meðal markahæstu manna en hann hefur haft óvenju hljótt um sig í vetur. Er búinn að skora 47 mörk eða 3,6 mörk að meðaltali í leik. Hann er í 62. sæti yfir markahæstu menn.

Björgvin Páll Gústavsson hefur varið vel í marki Bergischer og hann er í sjötta sæti yfir bestu markverðina. Er búinn að verja 170 skot í vetur eða 9,4 að meðaltali í leik.

Silvio Heinevetter, markvörður Füchse Berlin, er búinn að verja mest eða 222 skot sem gera 13,1 skot að meðaltali í leik.

Íslendingar á markalistanum:

23. sæti: Bjarki Már Elísson, 63 mörk (4,3 meðaltal)

62. sæti: Guðjón Valur Sigurðsson, 47 mörk (3,6 meðaltal)

72. sæti: Oddur Gretarsson, 42 mörk (3,2 meðaltal)

76. sæti: Hannes Jón Jónsson, 40 mörk (2,9 meðaltal)

79. sæti: Ólafur Bjarki Ragnarsson, 39 mörk (3,9 meðaltal)

124. sæti: Aron Pálmarsson, 24 mörk (3,4 meðaltal)

130. sæti: Ernir Hrafn Arnarson, 22 mörk (2,0 meðaltal)

143. sæti: Rúnar Kárason, 20 mörk (2,2 meðaltal)

157. sæti: Arnór Þór Gunnarsson, 16 mörk (3,2 meðaltal)

177. sæti: Alexander Petersson, 12 mörk (2,2 meðaltal)