Bandarísk flugmálayfirvöld hafa samþykkt umsókn Wow Air um leyfi til að fljúga til Bandaríkjanna. Ekki liggur þó fyrir hvenær félagið hefur sölu á farmiðum. Þetta kemur fram á vefnum túristi.is.
Forsvarsmenn Wow Air sóttu um miðjan nóvember um leyfi til að hefja flug til Bandaríkjanna hjá flugmálayfirvöldum þar í landi. Talsmaður bandarísku flugmálastjórnarinnar (FAA) segir í svari til Túrista að umsókn íslenska félagsins hafi verið afgreidd fyrir jól og Wow Air megi því hefja sölu á ferðum til Bandaríkjanna. Icelandair og Atlanta Air voru einu íslensku fyrirtækin sem voru með þess háttar leyfi þar til nú.
Fram kemur á Túrista að ekki hafi fengist upplýsingar hjá Wow Air um hvenær sala á ferðum til Bandaríkjanna hefjist en forsvarsmenn félagsins hafa áður sagt að stefnt sé að því að hefja flug til Boston í vor.
Wow Air má fljúga til Bandaríkjanna
