Ármann, eldhress gamlingi

Ármann er kominn til ára sinna. Hann steig sín fyrstu skref í miðborg Reykjavíkur undir lok þar síðustu aldar. Hann var nefndur eftir gömlum glímuþjálfara ofan úr Þingvallasveit, Ármanni í Ármannsfelli.

Eins og aldraðra er háttur er Ármann hógvær fram úr hófi. Ber sér ekki á brjóst, þótt fullt tilefni sé til. Hann á glæsilegan og stóran barnahóp sem dafnar vel og hefur meira að segja bæst í hópinn fram á síðustu ár. Börnin eru vel þekkt, nefna má sem dæmi dæturnar Fimi, Sund og Glímu og soninn Skíða. Alls eru börnin ellefu. Þeirra fósturbörn samtals um tvö þúsund á liðnum vetri.

Verandi elstur eftirlifandi systkina sinna hefur Ármann reynt að fara á undan með góðu fordæmi. Hann hefur ekki safnað skuldum og á nú, ólíkt sumum systkinum sínum, ágætis varasjóð. Hann hefur reynst þægilegur í umgengni og flutt sig til eftir því sem fóstra hans, frk. Reykjavík, hefur beðið hann um.

Heimili Ármanns er nú í bakgarði Þróttar, góðvinar hans. Húsakynnin eru ný og vistleg, þó þau rúmi ekki alla fjölskylduna. Sérstaklega langar þann gamla í stóra stofu til að geta tekið á móti gestum. Kannski fóstra hans byggi fyrir hann stofu á næsta stórafmæli?

Þakklátt fóstra sínum

Fjöldi barna og ungmenna sem Ármann hefur alið upp er meiri en nokkur hefur tölu á. Þetta er fólk sem hefur farið víða og er flest þakklátt fóstra sínum. Gísli Örn leikari, Magnús Scheving athafnaskáld, Guðrún Arnardóttir grindahlaupari, Bjarni Friðriksson júdókappi og auðvitað Ásdís Hjálms, hafa öll átt góðar stundir með Ármanni. Ekki má heldur gleyma hetjum fyrri ára, Hermanni Jónassyni, fyrrum forsætisráðherra, Guðmundi Arasyni í smíðajárni eða sómakonunni Guðrúnu Nielsen, svo einhver séu nefnd. Þau voru eins og fleiri ekki bara fóstruð af Ármanni heldur hjálpuðu til við að ala upp fjölda annarra ungmenna.

Ármann verður 125 ára undir lok árs. Á afmælisári vill fjölskyldan gera eitthvað honum til heiðurs. Í dag 11. maí, klukkan 10.00 ræsum við Afmælishlaup Ármanns við Þvottalaugarnar í Reykjavík (rétt hjá núverandi heimili hans). Í anda þess gamla verður unga fólkið í aðalhlutverki, þó öllum sé frjálst að hlaupa. Ekkert kostar að taka þátt. Allir þátttakendur fá viðurkenningu að hlaupi loknu.

Óskandi er að sem flestir nágrannar, vinir, fósturbörn og þeirra börn komi og gleðjist með gamlingjanum á laugardaginn kemur.