Þess vegna er ég leikskólakennari

Ég ákvað að setjast niður eina kvöldstund og setja á blað ástæðuna fyrir því að ég er leikskólakennari en ekki eitthvað annað. Staðan í dag er þannig að sárlega vantar leikskólakennara og sem innlegg í alla þá neikvæðu umræðu sem á sér stað um kennaranám langar mig aðeins að benda á jákvæðu hliðar námsins. Ég er útskrifaður leikskólakennari og vinn sem deildarstjóri á átta deilda leikskóla og mér finnst mjög gaman í vinnunni minni. Ég veit að ég er líka pínu spennufíkill og ég segi það í þeirri merkingu að mér finnst það spennandi að vita ekki hvað dagurinn á morgun ber í skauti sér. Ég veit ekki hverjar hugmyndir barnanna verða.

Einkunnarorð leikskólans mín eru: Hugmyndir barnsins, verkefni dagsins. Ég get svo bætt við þessar hugmyndir barnanna, spurt opinna spurninga sem leiða okkur annaðhvort áfram í okkar vinnu eða í allt aðra átt og kannski að öðru verkefni. Ég get verið úti í góða veðrinu, úti í rigningunni og sullað, eða leikið með flugdreka í vindinum. Farið og sótt efnivið í efnisveituna okkar og látið hugmyndaflugið leiða okkur áfram í vinnu með kastala, riddara, skip, báta, dreka og fleira sem okkur dettur í hug að útbúa. Ég get ekki sagt ykkur hvað ég verð að gera á morgun en ég get sagt ykkur hvað ég gerði í dag. Morguninn fór þannig fram að við útbjuggum turna, skip, kastala, eyju, fána og fleira skemmtilegt í hópastarfi. Þá tók við samvera þar sem við ræddum m.a. um afmælisdaga og heimilisföng, og svo drógum við miða upp úr poka með hinum ýmsu þrautum. Eftir góðan hádegismat og skemmtilegt spjall um hvað það væri sem er skemmtilegast í leikskólanum lögðum við af stað í skógarferð með vagn, hlaðinn nesti, tjaldi, teppi, litum, skeiðum, fótbolta og einhverju fleiru skemmtilegu. Við prófuðum að fara í brekkufótbolta, hafa það huggulegt inn í tjaldi og spjalla, fundum snigla og orma ofan í moldinni, settumst og sungum fyrir gesti og gangandi gæddum okkur svo á nesti sem var útbúið í leikskólanum fyrir okkur. Eftir þriggja tíma útiveru í grænni náttúrunni var haldið aftur heim í leikskólann.

Allir sælir og glaðir eftir góðan og skemmtilegan vinnudag. Þegar ég fer að sofa í kvöld get ég látið mig dreyma um ævintýrin sem bíða mín á morgun. Ef þú lest þetta og ert að hugsa hvað þú eigir að gera við líf þitt, hefur gott hugmyndaflug, finnst gaman að vinna með börnum, hefur gaman af að vera úti, leiðist að sitja á rassinum allan daginn þá er leikskólakennaramenntun eitthvað sem þú ættir alvarlega að íhuga. Ef þú vilt þá er hægt að lifa af laununum þínum, maður vill jú alltaf meira en það að finnast gaman í vinnunni sinni hlýtur að vera nokkurra gullpeninga virði.