Stöðugt gengi mikilvægt fyrir komandi kjarasamninga

Gengi krónunnar hefur verið stöðugt undanfarið og er það sérstaklega mikilvægt vegna komandi kjarasamninga þar sem verðbólguvæntingar eru mótandi fyrir umsamdar launahækkanir, og þar með þá verðbólgu sem fylgir í kjölfarið.

Gengi krónunnar hefur verið stöðugt í í október og í nóvember eftir að hafa veikst nokkuð í september.  Þá hefur veltan á millibankamarkaði með gjaldeyri verið lítil og þá sérstaklega núna í október.

Þetta kemur fram í frétt frá Greiningu Íslandsbanka. Þar segir einnig að Seðlabankinn hafi ekki verið með inngrip á millibankamarkaðinum frá miðjum október, sem sé lengsta tímabil án inngripa síðan í júlí síðastliðnum.

„Stöðugleiki krónunnar undanfarið er góð tíðindi. Sú mikla lækkun krónunnar sem var haustið 2012 og fram á vetur 2012/2013 er ekki að endurtaka sig nú.“Einnig er rekstrarumhverfi fyrirtækja og heimila stöðugra hvað þetta varðar.

Krónan hefur verið ríflega 3% sterkari gagnvart vegnu meðaltali helstu viðskiptamynta það sem af er nóvember en á sama tíma í fyrra. Yfir síðustu þrjá mánuði hefur krónan verið ríflega 2% sterkari en á sama tíma í fyrra. „Afraksturinn er lægri verðbólga og verðbólguvæntingar.“

„Tímasetning aukins stöðugleika á gjaldeyrismarkaði og sterkari krónu er sérstaklega mikilvæg í ljósi þess að framundan eru kjarasamningar þar sem verðbólguvæntingar eru mótandi fyrir þær launahækkanir sem samið verður um og þar með þá verðbólgu sem í fylgir í kjölfarið.“

Verðbólgan hefur lækkað frá 4,3% í ágúst í 3,9% í lok október samkvæmt könnun Seðlabankans. „Auk þessa höfum við undanfarið gerst öllu bjartsýnni á verðbólguþróunina næsta kastið í verðbólguspám okkar,“ segir í frétt Greiningar.

Capacent gerði könnun fyrir Samtök Atvinnulífsins og Seðlabankann í september. Þar kemur fram að tæpur helmingur stjórnenda stærstu fyrirtækja landsins vænta þess að gengi krónunnar muni lækka á næstu 12 mánuðum. Aðeins 8% þeirra telja að krónan muni styrkjast.