Opnar brátt vestra

Þessa dagana er Jón Stephenson von Tetzchner, fjárfestir og frumkvöðull (stofnandi Opera Software í Noregi), upptekinn við uppbyggingu og tengingu frumkvöðlasetra. Hér opnaði hann fyrir skömmu frumkvöðlasetrið Innovation House á Eiðistorgi á Seltjarnarnesi. Innandyra er rúmgott, enda um að ræða nálægt því 800 fermetra rými þar sem rúm er fyrir á þriðja tug fyrirtækja.

Jón er tiltölulega nýfluttur frá Noregi til Bandaríkjanna með konu sinni og þremur börnum, 17, 12 og 10 ára gömlum. „Ég er búsettur í Gloucester rétt fyrir norðan Boston,“ segir hann. Miklu hafi ráðið um valið á staðsetningu að þaðan er styst að fljúga til Íslands.

Jón er svo hér með annan fótinn, bæði til að fjárfesta og styðja við starfsemi Innovation House. „Svo finnst mér reyndar sumt minna á Ísland þarna úti. Þar getur blásið svolítið eins og á Nesinu,“ segir hann, en Jón er uppalinn á Seltjarnarnesi til tvítugs.

Í Gloucester segist Jón líka fá góðan fisk frá Íslandi, auk þess sem Whole Foods selji íslensk lambalæri á haustin. Úti í Noregi segist Jón ekki hafa fengið sama góða fiskinn og hann er vanur hér heima.

Ytra er Jón svo að byggja upp annað Innovation House með það fyrir augum að tengja setrin saman.

„Hugsunin er að fólk geti komið frá Íslandi og verið þarna um stund.“ Því fylgi minna umstang og kostnaður fyrir íslensk fyrirtæki sem vilji reyna fyrir sér í Bandaríkjunum en að flytja hluta starfseminnar út. Þá henti alls ekki öllum að setja sig niður í Silicon Valley. Gangi áætlanir eftir segist Jón taka yfir eign undir starfsemina vestra eftir rúma viku.

Obba fjárfestinga sinna segir Jón vera á Íslandi, en hann hefur sagt skilið við Opera Software og hefur smám saman verið að selja hlut sinn þar. „Fjárfestar og ég deildum ekki sýn á stefnu og því skildi leiðir.“

Til þessa segist Jón hafa fjárfest í einu fyrirtæki í Noregi og einu í Bandaríkjunum. Hér heima hefur hann svo fjárfest í Oz, SmartMedia, Búðinni, Spyr, Hringdu og Akra. Hann segist fjárfesta í tiltölulega fáum fyrirtækjum til þess að geta betur fylgt þeim eftir. „En hér í setrinu eru líka að koma fyrirtæki sem ég hef ekki fjárfest í.“

Jón segist vera „alvöru nörd“ að því leyti að hans helsta áhugamál er tækni. „Ég hef gaman af tækni og þá passar auðvitað vel að vinna við tækni.“ Þar fyrir utan segist Jón hafa gaman af íþróttum og hreyfingu og hann leyfi sér að fara á stöku fótboltaleik, enda ætlar hann á leik í London að lokinni fundasyrpunni á Íslandi.

Mannvinur og snillingur

Guðjón Már Guðjónsson, forstjóri Oz:

"Það sem fyrst kemur upp í hugann er hversu einstakt ljúfmenni Jón er og hlý persóna. Svo er hann líka hógvær því maðurinn er náttúrulega algjör snillingur, alveg ótrúlega klár. Svo er hann nörd og hefur gaman af því að nördast," segir Guðjón Már Guðjónsson og bætir við að þótt Jón hafi komið hingað til lands með ákveðnum stormi sem fjárfestir, ráði þar ekki peningaleg sjónarmið.

"Hann gerir þetta fremur af tengingu við föðurlandið og trú sem hann hefur á íslenskum kúltúr. Það sem drífur hann áfram er að leggja sitt af mörkum í uppbyggingu."

Anne Stavnes, samstarfskona Jóns:



"Jón er líklega almennilegasta manneskja í heimi. Ég vann fyrir hann í tíu ár hjá Opera. Svo flutti hann til Bandaríkjanna, en þegar mér bauðst að vinna fyrir hann aftur þurfti ég ekki að hugsa mig lengi um. Ég tók mig upp eftir að hafa búið í Noregi í 30 ár.

[...]

Jón lætur sér annt um allt sitt samstarfsfólk. Ég veit líka um fólk sem vann með Jóni hjá Opera og sagði honum að sama hvað hann ákvæði að taka sér fyrir hendur þá myndi það vilja taka þátt í því, hvar sem væri í heiminum."

Rolf Assev, vinur Jóns og fyrrverandi samstarfsmaður:

"Ég vann með Jóni í tólf ár og hann er framsýnasti maður sem ég hef unnið fyrir. Hann horfir á hlutina með langtímamarkmið í huga. Hann er harðduglegur og ræður til sín fólk sem þekkir betur til en hann sjálfur á þeim sviðum sem eru utan hans helstu styrkleikasviða," segir Rolf Assev.

"Jón treystir fólki, og ég myndi klífa hvaða fjall sem er, svo lengi sem Jón væri maðurinn sem tryggja ætti línuna."