Ísland er ekki opinbert sölusvæði iPhone

Tölvufyrirtækið Apple kynnti á dögunum tvo nýja snjallsíma sem bætast nú við símaúrval fyrirtækisins. Símarnir heita iPhone 5s og iPhone 5c.

„Það er erfitt að segja hvenær sendingin lendir hér á landi en iPhone er fluttur eftir óhefðbundnum leiðum hingað til lands því Ísland er ekki opinbert sölusvæði iPhone,“ segir Sigurður Helgi Ellertsson, starfsmaður í versluninni Macland.

Sigurður segir fólk sækja í iPhone vegna þess hve traustur hann er og stýrikerfið einfalt. IPhone 5s er fyrsti snjallsíminn sem kemur á markað með tveggja kjarna, 64 bita örgjörva sem líkist helst tölvuörgjörva. „Þetta er næsta kynslóð af snjallsímum.“

Hinn síminn, iPhone 5c er ekki ólíkur iPhone 5 hvað varðar afl og möguleika. „Hann verður fáanlegur í ýmsum litum og mun eflaust verða vinsæll sökum fagurs útlits,“ bætir Sigurður við.

Snjallsímanotkun Íslendinga hefur aukist mikið á síðustu árum og munu þessir nýju símar vafalaust vekja mikla lukku þegar þeir lenda hér á landi.