Tafir orðið á tillögum um afnám stimpilgjalda

Starfshópur sem átti að skila tillögum um afnám stimpilgjalda mun ekki skila af sér fyrr en um mitt ár 2013. Nefnd um endurskoðun neytendaverndar á fjármálamarkaði fékk líka frest.

Tafir hafa orðið á vinnu starfshóps sem ætlað var að skila fjármálaráðherra tillögu um breytingar á lögum um stimpilgjöld. Eftirlitsstofnun EFTA (ESA) gaf íslenskum stjórnvöldum upphaflega frest fram í október 2012 til að skila tillögunum. Skilafresturinn var síðan framlengdur að síðustu áramótum. Nú er áformað að starfshópurinn skili tillögum til ráðherrans um mitt þetta ár. Þetta kemur fram í svari fjármála- og efnahagsráðuneytis við fyrirspurn Markaðarins um málið.

Þegar ESA tilkynnti ákvörðun sína um að samþykkja þá ríkisaðstoð sem veitt var við endurskipulagningu Landsbankans, Arion banka og Íslandsbanka fylgdu því samþykki ákveðin skilyrði. Þau sneru að því að stjórnvöld og bankarnir sjálfir þyrftu að grípa til fullnægjandi ráðstafana til að draga úr röskun á samkeppni vegna tilurðar þeirra.

Jafnframt skuldbundu íslensk stjórnvöld sig til að endurskoða lög um stimpilgjald með það fyrir augum að afnema slík gjöld á útgáfu skuldabréfa einstaklinga þegar skipt er um kröfuhafa. Tilgangurinn er að draga úr kostnaði við flutning viðskiptavina á milli lánardrottna og fjarlægja þannig samkeppnishindrun. Auk þess yrði afnám stimpilgjalda til kostnaðarlækkunar fyrir neytendur. Skila átti tillögum um þetta sem frumvarpsdrögum í október 2012, sem nú hefur frestast fram á mitt þetta ár.

Samkvæmt skilyrðum ESA áttu íslensk stjórnvöld einnig að skipa nefnd til að endurskoða neytendavernd á íslenskum fjármálamarkaði, með sérstaka áherslu á að auðvelda neytendum að skipta um viðskiptabanka. Nefndin var skipuð í lok október 2012 og átti að ljúka störfum eigi síðar en 15. janúar síðastliðinn. Samkvæmt upplýsingum frá forsætisráðuneytinu hefur nefndin fengið frest til að skila niðurstöðu fram til 1. mars næstkomandi.