Upplýsingagjöf til ferðamanna

Það líður varla sá mánuður að ekki sjáist fréttir þess efnis að met hafi verið slegið í fjölda ferðamanna hingað til lands. Líklegt má telja að ferðamenn hafi verið á annan tug prósenta fleiri árið 2012 en árið áður. Einn af jákvæðum þáttum þessarar þróunar er að töluvert fjölgar utan háannatíma, og virðist sem svo að átakið Ísland allt árið sé meðal annars að skila þeim árangri.

Aðstæður til ferðalaga hér á landi að vetrarlagi eru gerólíkar aðstæðum að sumarlagi og líklegt má telja að þær séu enn frábrugðnari aðstæðum í heimalandi ferðalangs en sumrin. Öll þekkjum við hversu skjótt veðrið getur breyst, jafnvel skollið á snjóstormur á augabragði. Ekki síður geta aðstæður á yfirborði vega breyst í einni svipan og hvað þá verið af ýmsum toga á ekki svo löngum vegarköflum. Einnig þarf að hafa í huga að þjónusta á vegum er misjöfn og ekki er hægt að ganga út frá því að vegir sé alltaf opnir.

Þessar fjölbreytilegu og oft erfiðu aðstæður setja auknar kröfur á ferðaþjónustuaðila varðandi upplýsingagjöf til ferðamanna. Hún má og á ekki eingöngu að snúast um að upplýsa um áhugaverða staði, gistimöguleika og ferðir sem í boði eru. Starfsmenn á gististöðum, á upplýsingamiðstöðvum ferðamanna, bílaleigum og öðrum viðkomu- og dvalarstöðum ferðamanna ættu að hafa inni í sínum þjónustuferlum að spyrja hvert förinni er heitið og ráðleggja þá um þau atriði sem hafa ber í huga til að gera ferðalagið enn betur heppnað.

Ferðaáætlun

Fyrst og fremst ber alltaf að mæla með því að viðkomandi geri ferðaáætlun og skilji eftir en slíkt má til dæmis gera á vefnum safetravel.is. Einnig er mikilvægt að fólk sé með réttan búnað og má til dæmis nefna að við akstur um landið ætti ætíð að vera teppi eða svefnpoki ásamt einhverju nesti í bílnum. Slíkt kemur sér vel ef för tefst eða ef viðkomandi festir sig sem dæmi. Réttur klæðnaður skiptir einnig miklu máli þó ekki sé gengið lengra en um Dimmuborgir eða að Gullfossi. Búnaðarlista fyrir ýmsar tegundir ferða má finna á vef Safetravel.

Upplýsingar um færð og veður má segja að ættu að vera fastur liður í upplýsingagjöf til ferðamanna. Á vef Veðurstofunnar www.vedur má skjótt finna veðurspá og einnig viðvaranir ef spáð er varasömu veðri en einnig má beina ferðalöngum sjálfum á þann vef þar sem hann er á ensku. Á vef Vegagerðarinnar www.vegagerdin.is má finna upplýsingar um færð á vegum. Á vef Safetravel www.safetravel.is má finna mikið af fróðleik fyrir ferðaþjónustuaðila og ferðamenn. Einnig má þar finna upplýsingar um veður og færð enda markmiðið að þar séu á einum vef allar upplýsingar sem auki líkur á öruggu ferðalagi.

Á hverjum vetri sinna sjálfboðaliðar björgunarsveita Slysavarnafélagsins Landsbjargar miklum fjölda aðstoðarbeiðna er varða ferðamenn. Eru þær beiðnir af ýmsum toga en ljóst að mörg tilfelli má koma í veg fyrir með aukinni upplýsingagjöf til ferðamanna. Leggjumst öll á eitt og upplýsum okkar gesti um meira en keypta þjónustu og aukum þannig líkur á ánægjulegu og öruggu ferðalagi.