Alþjóðlegur dagur missis á meðgöngu: Feður byrgja sorgina frekar inni

Í dag er alþjóðlegur dagur tileinkaður missi á meðgöngu.

Jón Þór Sturluson og eiginkona hans Anna Sigrún Baldvinsdóttir eru á meðal þeirra fjölmörgu foreldra sem gengið hafa í gegnum þá erfiðu reynslu að missa ófætt barn sitt.

Sonur þeirra fæddist andvana á 32 annarri viku meðgöngunnar, fyrir tæpum 18 árum síðan.

Jón Þór segir karlmenn upplifa fósturlát á annan hátt en konur, en sorg þeirra engu síðri. 

„Það er náttúrulega gríðarlegur missir fyrir foreldra almennt en vissulega er líkamlega nálgunin önnur. En feður, ekki síður en mæður, byrja að mynda sitt samband við barnið áður en það fæðist. Þú hefur allskonar væntingar, áætlanir og tilhlakkanir um hvernig þetta samband verður á milli þín og barnsins. Svo þegar það er alltíeinu tekið þá er ansi margt sem hverfur,“ segir hann.

Jón Þór segir missi feðra bæði raunverulegan og tilfinningalegan. Hann segir stuðning innan heilbrigðiskerfisins mjög góðan báðum kynjum og komið hafi verið fram við þau hjónin sem jafningja hvað þetta varðar.

Hinsvegar séu gamlar hefðir ríkjandi í samfélaginu sem geri fólki og þá sér í lagi feðrum erfiðara um vik að ræða slíkan missi.

„Versta sem að menn geta gert, og á það þá kannski frekar við um karla, að byrgja hlutina niðri. Það þarf ekki að bera tilfinningar sínar á torg en það er mikilvægt að fela þær ekki fyrir sjálfum sér.“

Í tilefni af alþjóðadeginum verður boðið upp á kyrrðarstund í Garðarkirkju á Álftanesi í kvöld klukkan 20:00