Samningurinn lánssamningur að mati Hæstaréttar

Samningur Flugastraums ehf. við SP-Fjármögnun hf. um fjármögnun á kaupum á dráttarvél var lánssamningur að mati Hæstaréttar og gengistrygging fjárhæða því ólögmæt.

Í samningnum, sem gerður var árið 2006, var kveðið á um gengistryggingu fjárhæða. Slík gengistrygging telst vera ólögmæt ef um er að ræða lánssamning en lögmæt ef um er að ræða leigusamning.

Í tilkynningu frá Landsbankanum segir að ljóst sé að dómurinn hafi áhrif á mat á því hvort sambærilegir samningar hjá Landsbankanum teljist vera leigusamningar eða lánssamningar með ólögmæta gengistryggingu.

Mun bankinn fara vandlega yfir rökstuðning Hæstaréttar og meta hversu víðtækt fordæmisgildi dómsins er.  Í kjölfarið munu samningar, sambærilegir þeim samningi sem deilt var um í málinu, verða endurreiknaðir.