Flensburg heldur toppsætinu | Alfreð hafði betur gegn Degi í baráttunni um annað sætið

Flensburg er enn á toppi þýsku úrvalsdeildarinnar eftir öruggan sigur á lærisveinum Aðalsteins Eyjólfssonar, Eisenach 43-24. Kiel er stigi á eftir Flensburg eftir að hafa lagt Füchse Berlin 33-29.

Eins og tölurnar gefa til kynna var aldrei spenna í Flensburg í dag. Liðið hafði mikla yfirburði í leiknum og sýndi styrk sinn. Liðið er með 29 stig á toppnum en Eisenach er með 7 stig í þriðja neðsta sæti deildarinnar.

Ólafur Gústafsson skoraði tvö mörk fyrir Flensburg og Bjarki Már Elísson eitt fyrir Eisenach.

Kiel var með mikla yfirburði í Berlín en með frábærum endasprett náðu Refir Dags Sigurðssonar að minnka muninn úr átta mörkum í þrjú en það var bæði of lítið og of seint og sigur Kiel í raun aldrei í hættu.

Alfreð Gíslason fagnaði því enn einum sigrinum í rimmum sínum við Dag Sigurðsson en Aron Pálmarsson skoraði 4 mörk fyrir Kiel og Guðjón Valur Sigurðsson 3.

Kiel er með 28 stig í öðru sæti deildarinnar en Füchse Berlin er enn með26 stig í þriðja sætinu.