Heimir Óli og Aron Rafn náðu sér ekki á strik í sigri

Eskilstuna Guif lagði Ystads 30-22 í sænsku úrvalsdeildinni í handbolta í dag þrátt fyrir að hvorki Heimir Óli Heimsson né Aron Rafn Eðvarðsson næðu sér neitt sérstaklega á strik.

Aron Rafn varði 3 skot í leiknum og var með 20% markvörslu í leiknum. Heimir Óli skoraði 1 mark í fjórum skotum en hann fiskaði 3 víti í leiknum.

Viktor Östlund skoraði 5 mörk fyrir Guif og var markahæstur. Rickard Åkerman, Mathias Tholin og Helge Freiman skoruðu 4 mörk hver.

Hjá Ystads skoraði Andreas Thynell 6 mörk og Mikkel Ibsen 4.

Guif fór með sigrinum upp í sjötta sæti deildarinnar með 18 stig en Ystads er í tíunda sæti með 11 stig.