Hans Lindberg fékk rautt spjald í tapi á móti Ólafi og félögum

SG Flensburg-Handewitt vann þriggja marka sigur í þýskum slag á móti HSV Hamburg, 27-24, í Meistaradeildinni í handbolta í kvöld en þetta var uppgjör tveggja efstu liðanna í D-riðlinum. Flensburg náði toppsætinu af HSV með þessum sigri.

Flensburg hefur náð í 11 stig af 14 mögulegum en HSV Hamburg er með tíu stig. Danska liðið Aalborg er síðan í þriðja sæti riðilsins með sex stig.

HSV var 13-11 yfir í hálfleik en Flensburg tryggði sér sigurinn með því að vinna seinni hálfleikinn með fimm marka mun, 16-11.

Danski hornamaðurinn Anders Eggert var markahæstur hjá Flensburg með níu mörk og Steffen Weinhold skoraði sex mörk. Ólafur Gústafsson komst ekki á blað.

Petar Djordjic var markahæstur hjá HSV með átta mörk en Daninn með íslensku foreldrana, Hans Lindberg, skoraði fjögur mörk áður en hann var rekinn af velli með rautt spjald.