Plain Vanilla fjölgar starfsmönnum

Fyrirtækið Plain Vanilla, sem framleiðir QuizUp leikinn, auglýsir í blöðum í dag sjö laus störf. Störfin eru auglýst undir fyrirsögninni: Okkur vantar fleira fólk sem langar að sigra heiminn. Meðal þeirra starfa sem auglýst eru má sjá, spurningahöfundur, samfélagsgúrú, yfirmaður gæðastjórnunar og gagnagreinir.

Leikurinn sem var gefinn út á hádegi á fimmtudag er orðinn vinsælasti spurningaleikurinn í vefverslun Apple í 30 löndum af þeim 131 sem hafa aðgang að því. Að meðaltali hafa 120.000 manns náð í leikinn í síma sína á dag síðan leikurinn, sem er ókeypis, var gefinn út.

Þrátt fyrir að auglýst var eftir störfunum fyrst nú í morgun hefur Plain Vanilla þegar borist nokkrar umsóknir. Fólk er mjög meðvitað um fyrirtækið, enda hefur það hlotið mikla umfjöllun í kjölfar útgáfu QuizUp.

Hér er hægt að sjá frekari upplýsingar og sækja um. Umsóknarfrestur er til 15. nóvember.