Safnað fyrir fyrsta tölublaði Neptún

Söfnun fyrir fyrstu prentun hins nýja tímarits Neptún hófst á hópfjármögnunarsíðunni Karolina Fund. Neptún er nýtt íslenskt tímarit sem fjallar um myndlist, hönnun og arkitektúr. Í tímaritinu verður íslensk grasrót í forgrunni ásamt áhugaverðum einstaklingum hvaðanæva úr heiminum, eins og segir í tilkynningu.

„Markmið blaðsins er að kanna og kynna fjölbreytta flóru skapandi starfs á öllum stigum. Tímaritið á sér ekki hliðstæðu hér á landi og til að gera það aðgengilegt fyrir sem flesta þá verða textar tímaritsins bæði á ensku og íslensku.“ Fyrsta tölublað Neptún er væntanlegt í byrjun desember og verður eftirleiðis gefið út ársfjórðungslega.

Á bakvið tímaritið standa þær Ágústa Arnardóttir, Elsa Ýr Bernhardsdóttir, Helga Björg Kjerúlf og Kolbrún Þóra Löve, en þær hafa lokið námi ýmist í vöruhönnun, arkitektúr eða myndlist.

Á Karolina Fund er hægt að leggja háar og lágar upphæðir til styrktar útfáfu tímaritsins. Þeir sem styrkja útgáfuna geta á sama tíma forkeypt tímaritið, eignast stækkaðar myndir úr því, eignast sérútbúið prentverk eða fengið heilsíðuauglýsingu í tímaritinu.

Hægt er að styrkja útgáfuna hér.