Marel opnar nýtt sýningarhús í Kaupmannahöfn

Marel opnaði í dag nýtt sýningarhús í Kaupmannahöfn. Sýningarhúsið hefur hlotið nafnið Progress Point og verður notað fyrir vörusýningar, fundi með viðskiptavinum og þjálfun starfsfólks.

Í Progress Point munu viðskiptavinir Marel fá tækifæri til að kynnast frá fyrstu hendi hvernig tæki, kerfi og lausnir Marel geta hjálpað þeim að bæta nýtingu, auka arðsemi og skapa þannig meiri verðmæti í sínum iðnaði, hvort sem það er í fisk-, kjúklinga- eða kjötiðnaði.

Sérhönnuð sýningarrými sem mæta þörfum viðskiptavina

Progress Point  er  alls 2.700 fm2 að stærðog skipað sýningarrýmum, fundarherbergjum, ráðstefnusal, eldhúsi og fjölda smærri og stærri rýma sem hægt er að nota í margvíslegum tilgangi.  Í húsinu verður hægt að halda vörusýningar stórar og smáar, viðburði af ýmsum toga og þjálfa starfsfólk Marel. Sýningarsvæðið í Progress Point er blautrými og einnig er hægt að kæla rýmið niður til að skapa sömu aðstæður og er að finna í raunverulegum vinnslurýmum sem auðveldar  ferlið við að finna bestu lausnina fyrir viðskiptavini hverju sinni.

Progress Point er í 5 mínutna fjarlægð frá Kastrup flugvelli. Staðsetningin gerir það að verkum að mögulegt er fyrir marga af viðskiptavinum Marel að heimsækja Progress Point að morgni og komast heim að kvöldi sama dags.

Mikill ávinningur fyrir viðskiptavini Marel

Með tilkomu Progress Point skapast tækifæri til aukinnar hagræðingar þar sem fjöldi sýninga og funda sem áður fóru fram víða um heim verða nú undir einu þaki á miðlægum stað.  Á hverju ári tekur Marel þátt í um 40 vörusýningum víðs vegar um heiminn þar sem nýjar vörur eru kynntar viðskiptavinum í oft á tíðum mjög erilsömu umhverfi þar sem tími með hverjum og einum er ekki mikill.  Tilkoma sýningarhússins mun gjörbreyta aðstöðu fyrirtækisins til að kynna vöruframboð sitt og sýna viðskiptavinum búnað og kerfi Marel í sérhönnuðu sýningarumhverfi án utanaðkomandi truflunar. Í Progress Point verður auðveldara að tengja saman viðskiptavini og starfsfólk  en oft getur það verið miklum erfiðleikum háð þar sem starfsemi Marel nær til 32 landa í öllum heimsálfum.

Fyrsta stóra vörusýningin fer fram í Progress Point í byrjun febrúar þegar Marel Salmon ShowHow verður haldið. Sýningin hefur skapað sér nafn sem ein besta alþjóðlega sýningin á tækjabúnaði og lausnum fyrir vinnslu laxaafurða.  Þar munu allir fremstu laxaframleiðendur heims koma saman og kynna sér það nýjasta sem Marel hefur upp á að bjóða á þessu sviði.