Baggalútur ehf. hagnaðist um 5,2 milljónir árið 2012

Félagið Baggalútur ehf. skilaði 5,2 milljóna króna hagnaði á síðasta ári. Árið áður var 400.000 króna tap á rekstrinum. Frá þessu er sagt í Viðskiptablaðinu í dag.

Nýr hluthafi bættist í hóp hluthafa Baggalúts ehf. á síðasta ári. Þá eru hluthafarnir orðnir sjö, hver með 14% eignahlut. Nýi hluthafinn er Guðmundur Kristinn Jónsson gítarleikari hljómsveitarinnar Hjálma.

Önnur breyting sem hefur átt sér stað er að Bragi Valdimar Skúlason er eini stjórnarformaðurinn en allir hluthafarnir sjö sitja í stjórn félagsins. Ekki er hægt að sjá heildarveltu félagsins, því reikningur félagsins er samandreginn en rekstrarhagnaður í fyrra var 6,1 milljón króna, en 1,2 milljóna rekstrartap varð árið 2011.

Eigið fé í árslok 2012 var 26,3 milljónir króna og þar af handbært fé og markaðsverðbréf 16,2 milljónir króna. Skuldir voru 10,5 milljónir og eigið fé því um 15,7 milljónir króna.