Heimir skiptir aftur yfir í Akureyri

1. deildarlið Hamranna varð fyrir áfalli í dag er reynsluboltinn Heimir Örn Árnason ákvað að skipta aftur yfir í úrvalsdeildarlið Akureyrar.

Heimir spilaði með Hömrunum gegn Selfossi í gærkvöldi en það var hans síðasti leikur fyrir félagið. Í bili að minnsta kosti.

Heimir er þjálfari Akureyrarliðsins ásamt Bjarna Fritzsyni. Illa hefur gengið hjá liðinu í vetur og þjálfarinn ætlar greinilega að reyna að hjálpa til á vellinum.

Hamrarnir eru ekki af baki dottnir og stefna að því að bæta við sig leikmönnum fyrir lok félagaskiptagluggans.