Hefja viðræður um Sundabraut

Samþykkt var á fundi borgarstjórnar Reykjavíkur í gær að hefja viðræður við ríkið um Sundabraut. Júlíus Vífill Ingvarsson, oddviti borgarstjórnarflokks Sjálfstæðisflokksins flutti tillögu þess efnis.

Samþykkt var einróma að vísa tillögunni til borgarráðs og tóku borgarfulltrúar Besta flokksins og Samfylkingarinnar undir tillöguna. „Auðvitað dylst engum að Sundabraut er ekki að fara í framkvæmd á næstu mánuðum eða jafnvel næstu árum. Slík framkvæmd krefst mikils undirbúnings. Sundabraut er hægt að taka í áföngum og einhvers staðar verður að byrja. Mér finnst mikilvægt að horfa til þess kaupauka sem fylgir Sundabraut fyrir borgina,“ sagði Júlíus Vífill á borgarstjórnarfundi í gær.

Í bókun borgarfulltrúa Sjálfstæðisflokksins kom fram að samkvæmt umferðaspám um nýtingu Sundabrautar er gert ráð fyrir að 23.000 til 30.000 bílar aki um Sundabraut árið 2030. Til samanburðar fara 5.000 bílar um Hvalfjarðargöng á sólarhring, innan við 1.000 bílar fara að meðaltali um Héðinsfjarðargögn á sólarhring og reiknað er með að um 1.200 bílar muni fara um Vaðlaheiðargöng á sólarhring þegar þau opna.

Líklegt að arðsemi framkvæmdarinnar verði viðunandi

Nýting Sundabrautar (með göngum eða brú yfir Kleppsvík) er því líkleg til að vera viðunandi og má búast við að arðsemi framkvæmdarinnar verði það einnig. Við arðsemismat verður að líta til þess ávinnings sem Reykjavíkurborg hefur af því að fá vegtengingu við borgarland sem er stærra en marga grunar. Geldinganes er álíka stórt og elsti hluti borgarinnar. Sambærilegt svæði að stærð nær frá Ánanaustum til Rauðarárstígs og frá Sæbraut að Hringbraut. Með tilkomu Sundabrautar verður nesið í góðum tengingum við allt vegakerfi höfuðborgarsvæðisins. Skipulag og nýting Geldinganess, Álfsness og Kjalarness í framtíðinni býður upp á mikla möguleika en forsenda þess er að Sundabraut verði sett í framkvæmd.

Í tillögu að aðalskipulagi er Ártúnshöfði merktur sem þróunarsvæði og er gert ráð fyrir 3.200 íbúðum þar. Stefnt er að því að iðnaðarstarfsemi á Höfðanum færist annað. Ekki er í nýju aðalskipulagi sýnt fram á önnur sambærileg atvinnusvæði til uppbyggingar fyrir iðnað. Verði ekki skapaðar aðstæður fyrir iðnrekstur munu stjórnendur augljóslega ekki byggja upp á nýjum stað í borginni. Geldinganes og Álfsnes eru svæði sem eru vel til þess fallin að taka við þeirri starfsemi.