Stjórnendur svartsýnni á þróun verðbólgu

Stjórnendur stærstu fyrirtækja landsins vænta þess að verðbólga á Íslandi verði um 3,7 prósent eftir eitt ár en verði komin upp í 4,6 prósent eftir tvö ár. Núna er verðbólgan 3,9 prósent. Þetta kemur fram á vef Greiningardeildar Íslandsbanka.

Þetta er töluvert svartsýnni spá en sú sem gerð var í maí á þessu ári þar sem kom fram að stjórnendur bjuggust við að tólf mánuðum síðar væri verðbólgan komin niður í 3,2 prósent. Þetta kemur fram í könnun sem Capacent gerði fyrir Samtök atvinnulífsins og Seðlabankann í september.

Verðbólgumarkmið Seðlabankans er 2,5 prósent. Í maí jók Seðlabankinn virkni sína á gjaldeyrismarkaði í von um að auka stöðugleika gjaldmiðilsins og lækka verðbólguvæntingar. Markmiðið var að bankinn myndi ná verðbólgumarkmiði sínu.

Minni sveiflur hafa verið á gengi krónunnar en eins og áður segir hafa verðbólguvæntingar versnað. Ástæður fyrir tregðu í verðbólguvæntingu telur nefndin að sé óvissa um áhrif kjarasamninga, greiðslubyrði erlendra lána, uppgjörum þrotabúa gömlu bankanna og yfirvofandi losun fjármagnshafta á gengisþróun. Í könnun Capacent kemur einnig fram að tæpur helmingur stjórnenda væntir þess að gengi krónunnar lækki á næsta ári.