Svartur markaður blússar á Facebook

Skattrannsóknarstjóra hafa borist töluvert af ábendingum vegna netverslana sem starfræktar eru í gegnum Facebook. Grunur leikur á að slíkar verslanir séu í einhverjum tilfellum reknar svart, en sömu reglur gilda um netverslanir og önnur viðskipti.

Ef orðinu netverslun er slegið upp í leitarglugga á Facebook kemur í ljós að slíkar íslenskar netverslanir skipta tugum. Þar er hægt að kaupa allt á milli himins og jarðar, en mest árberandi eru síður sem selja fatnað, skó skart og aukahluti fyrir síma og snjalltölvur. Það er greinilegt að fjöldi fólks hefur atvinnu og tekjur af því að reka slíkar síður.

Jón Guðmundsson, skrifstofustjóri hjá Ríkisskattstjóra, segir sömu lög gilda um netverslanir á Facebook og aðrar verslanir. Tilkynna þurfi starfsemina, halda bókhald og borga af henni virðisaukaskatt.

Frétt sem birtist á Vísi.is í dag um íslenska sölusíðu á Facebook hefur vakið mikla athygli. Í kommentakerfi fréttarinnar mynduðust heitar umræður þar sem því er meðal ananrs varpað fram að sölusíður á Facebook séu í mörgum tilfellum svört atvinnustarfssemi. Jón segir að viðurlög við slíkum skattsvikum geti verið háar fjárupphæðir og í verstu tilfellunum fangelsi.

Fréttastofan spjallaði í dag við nokkra einstaklinga sem lent hafa í ýmsu misjöfnu eftir að hafa verslað í gegnum Facebook. Vörurnar komust í sumum tilfellum aldrei til skila, fólk átti erfiðleikum með að skila og fá endurgreitt, og í verstu tilfellunum hreinlega hurfu síðurnar af Facebook eða skiptu um nafn. Það er því öruggast að ganga í skugga um að kvittun fylgi öllum slíkum kaupum því annars getur verið um vafasaman verslunarrekstur að ræða.

Fréttastofa ræddi einnig við Gunnar Thorberg Kristjánsson, forstöðumann rannsóknarsviðs hjá Skattrannsóknarstjóra, og sagði hann að starfsfólk þar væri meðvitað um þetta vandamál og fjöldi ábendinga bærust vegna netverslana á Facebook. Engin sérstök rannsókn er þó í gangi eins og er.