Forstjóri Stolichnaya Vodka fordæmir rússnesk stjórnvöld

Aðalforstjóri Stolichnaya Vodka hefur í opnu bréfi til hinsegin samfélagsins um allan heim fordæmt stefnu rússneskra stjórnvalda varðandi réttindi hinsegin fólks og sver af sér öll tengsl við rússnesk stjórnvöld. Gífurlegir viðskiptahagsmunir eru í húfi ef hinsegin samfélagið ákveður að sniðganga vörur fyrirtækisins.

Stundum er talað um áhrif bleika dollarans, pundsins og svo framvegis og er þá átt við áhrifamátt eyðslu hinsegin fólks sem er oft annars konar en gengur og gerist. Hinsegin samfélagið er mjög alþjóðlega tengt og notar veraldarvefinn mikið.

Mörg fyrirtæki hafa farið flatt á að fara gegn hinsegin samfélaginu og féll sala Heineken í Bretlandi til að mynda fyrir nokkrum árum um allt að 10 prósent þegar fyrirtækið ákvað að segja upp kostunarsamningum við hinsegin hátíðir þar í landi og þúsundir bara hentu Heineken bjórnum út.

Nú hefur Val Mendeleev aðalforstjóri Stolichnaya Vodka skrifað hinsegin samfélaginu opið bréf þar sem hann segir fyrirtækið algerlega mótfallið nýlegri lagasetningu í Rússlandi sem takmarkar mannréttindi hinsegin fólks. Ástæðan er sú að nú er hvatt til þess í hinsegin samfélaginu að fólk sniðgangi rússneskar vörur.

Aðalforstjórinn minnir réttilega á öflugan stuðning fyrirtækisins við hinsegin hátíðir víðs vegar um Bandaríkin, Evrópu og Suður Afríku. Það hafi meðal annars kostað gerð heimildarmyndar um líf samkynhneigðra í Bandaríkjunum árið 2006. Fyrirtækið muni áfram styðja við hinsegin samfélagið.

Þá ítrekar forstjórinn andstöðu sína við stefnu rússneskra stjórnvalda og sver af sér öll eignatengsl fyrirtækisins við rússnesk stjórnvöld. Þau eigi ekkert í fyrirtækinu, sem sé í einkaeign og rekið frá höfuðstöðvum þess í Luxemburg, þótt megin hráefni vodkans, eins og rúgur og hreinn vínandi komi frá Rússlandi og Lettlandi.

Forstjórinn lýsir því yfir að Stolichnaya styðji algerlega baráttu hinsegin samfélagsins gegn fordómum í Rússlandi.

Áhrifamikill bloggari í hinsegin samfélaginu segir bréfið ágætt út af fyrir sig, en forstjórinn ætti að senda Vladimir Putin forseta Rússlands persónulega sams konar bréf, meini hann eitthvað með yfirlýsingum sínum. Þangað til hann geri það haldi hinsegin samfélagið áfram að sniðganga rússneskar vörur.