Smíðar stóla og borð úr 100 ára gömlum viði

The art of being Icelandic er yfirskrift sýningar sem opnuð var í Ráðhúsi Reykjavíkur í gær. Íslenskar bókmenntir eru þar í fyrirrúmi en þar má einnig finna húsgagnahönnun þar sem efniviðurinn er mörg hundruð ára gamall.

Hugmyndin að sýningunni vaknaði þegar lítið virtist vera í boði fyrir þá fjölmörgu ferðamenn sem heimsækja ráðhús Reykjavíkur daglega til að skoða Íslandskortið í Tjarnasal. Reykjavík var í ágúst 2011 útnefnd bókmenntaborg UNESCO og var sýningin sett upp með hliðsjón af því.

"Og þá kemur þessi hugmynd upp, að halda upp á þær íslensku bækur sem þýddar hafa verið á erlendum tungumálum. Við erum með um 250 titla hérna sem fólk getur skoðað á 50 tungumálum, ef ekki fleirum", segir Ingi Þór Jónsson, framkvæmdarstjóri sýningarinnar.

Bókamessan í Frankfurt, þar sem Ísland var með sýningu, þóttist heppnast afar vel og er innblásturinn fyrir uppsetningu sýningarinnar í Ráðhúsinu að hluta til sóttur þaðan.

"Við höfum svona reynt að gera svona þrjú afbrigði af mini íslenskum stofum og það ætti að geta gefið þeim smá tækifæri á að upplifa okkur."

Sóleyjarstjóllinn eftir Valdimar Harðarson fagnar um þessar mundir 30 ára afmæli sínu og er hann til sýnis í Ráðhúsinu. Þar má einnig finna verk eftir Jóhann Sigmarsson en hann hannaði og smíðaði stóla, borð og rúm. Viðurinn sem notaður er til verksins er aldargamall og fenginn úr Reykjavíkurhöfn. Viðnum átti að henda en Jóhann sá að nýta mátti hann í annað.

"Hann er hundrað ára gamall en þetta er af tvö til þrjú hundruð ára gömlum trjám. Þetta er samskonar viður og þeir hafa notað í sökklana í húsunum í Feneyjum", segir Jóhann.

Stóllinn sem Jóhann hannaði og nefnist upp á enska tungu; The Gift of Spirit keppir til úrslita á alþjóðlegri innanhúshönnunarkeppni í London. Ekki er útilokað að stóllinn fari í fjöldaframleiðslu. Athyglin sem hönnun Jóhanns hefur fengið hefur komið honum sjálfum á óvart.

"Það er bara gott. Ég hafði ekki hugmynd um að ég gæti smíðað eða hannað nokkurn skapaðan hlut."