Spáin: Keflavík hafnar í 11. sæti

Íþróttadeild Vísis og Fréttablaðsins spáir í spilin fyrir Pepsi-deild karla sem hefst þann 5. maí næstkomandi. Við spáum því að Keflavík muni enda í 11. sæti og falla með Víkingi.

Keflavík hefur leikið í efstu deild frá árinu 2004 en nú telur Fréttablaðið líkur á því að liðið leiki í næstefstu deild að ári. Liðið hefur misst markahæsta leikmann félagsins frá upphafi, Guðmund Steinarsson, og ólíklegt að serbneskur staðgengill hans fylli í skarðið.

Miðjan er skipuð efnilegum strákum sem munu þó sakna hörkutólsins Einars Orra Einarssonar sem glímir við meiðsli. Liðið mætir FH og KR í fyrstu leikjum sínum og hætt við því að slæm byrjun gæti sett liðið útaf laginu.

Stjarnan: Jóhann Birnir Guðmundsson

Mikil ábyrgð hvílir á herðum Jóhanns sem verður 36 ára á árinu. Atvinnumaðurinn fyrrverandi þarf að eiga topptímabil og vera stoð og stytta ungu leikmannanna ef ekki á illa að fara í Keflavík.

Þjálfarinn:

Zoran Daníel Ljubicic  er er 46 ára gamall og lék á sínum tíma 169 leiki í efstu deild. Á að baki eitt tímabil sem þjálfari í efstu deild (22 leikir, 8 sigrar, 43 prósent).

Nýju andlitin:

Halldór Kristinn Halldórsson (Valur)

Magnús Þórir Matthíasson (Fylkir)

Ray Anthony Jónsson (Grindavík)

Faed Gazibegovic (Slóveníu)

Marjan Jugovic (Barein).

Fylgstu með þessum:

Sigurbergur Elísson – öflugur miðjumaður sem var loksins meiðslafrír í fyrra.

Hvað er langt síðan ...

... liðið varð meistari – 40 ár

... liðið var inn á topp 3 – 5 ár

... liðið varð bikarmeistari – 7 ár

... liðið féll úr efstu deild – 11 ár

... liðið skoraði flest mörk í deildinni – 5 ár

... liðið skoraði minna en 20 mörk á einu tímabili – 15 ár.

Einkunnaspjaldið

Vörnin 2/5

Sóknin 2/5

Þjálfarinn  2/5

Breiddin 1/5

Íslandsmeistari:

4 sinnum, síðast 1973.

Bikarmeistari:

4 sinnum, síðast 2006.