Vikan í F1 kostar minnst 230 milljónir króna

Marussia-liðið hefur gert stóran styrktarsamning við rússneska veðmálafyrirtækið Liga Stavok. Andy Webb, framkvæmdastjóri liðsins, vildi ekki gefa nánari upplýsingar um samninginn þegar hann yfirgaf hótelið í Moskvu en sagði hann auka fjárráð liðsins verulega.

„Allir vita að við erum með þynnsta veskið í Formúlu 1 og svo ég sé hreinskilinn þá er ég stolltur af því," sagði Webb. Marussia-liðið hefur barist við Caterham-liðið undanfarin ár um neðstu sætin í heimsmeistarakeppninni. Verandi ríkara liðið hefur Caterham staðið sig betur en Marussia undanfarin ár en í ár virðist vera breyting þar á.

„Það kostar okkur 1,25 milljónir punda á hverri viku að fá að taka þátt í Formúlu 1 og halda okkar striki. Ef þú vilt keppa við stærri lið þarftu miklu meira af peningum."

Webb er kokhraustur í kjölfar styrktarsamningsins og mælir með því að fólk veðji á Marussia í baráttunni við Caterham þetta árið. „Ég mundi einnig ráðleggja fólki að veðja á að Marussia vinni sitt fyrsta stig."