Rifti viðskiptum með verðlaus bréf í Baugi

Fimmtán milljarða króna greiðsla Baugs Group sem greidd var sumarið 2008 til Fjárfestingafélagsins Gaums, Gaums Holding S.A. og Eignarhaldsfélagsins ISP og Bague S.A. var rift í Héraðsdómi Reykjavíkur í dag. Ber félögunum að greiða þrotabúi Baugs þessar samsvarandi upphæðir til baka. Félögin voru í eigu Jóhannesar Jónssonar, Jóns Ásgeirs Jóhannessonar og fjölskyldu þeirra.

Málið tengist sölu Baugs Group á Högum til félagsins 1998 ehf, en félagið 1998 var einnig í eigu Jóhannesar, Jóns Ásgeirs og fjölskyldu. Eftir að Baugur Group seldi Haga til 1998 ehf. var ákveðið að Baugur myndi kaupa hlutabréf áðurnefndra fjögurra félaga í sjálfu sér fyrir alls fimmtán milljarða króna. Í dómnum segir að hlutabréf í Baugi Group hafi á þessum tíma, þ.e. sumarið 2008, verið verðlaus. Því hafi í raun ekkert endurgjald hafi komið fyrir þær greiðslur sem hin stefndu félög, Gaumur, Gaumur Holding, ISP og Bague fengu frá Baugi.

„Þá ber að leggja til grundvallar að greiðslurnar hafi í raun skert eignir Baugs og raskað hagsmunum almennra kröfuhafa við slit á búi félagsins," segir í dómnum. Þá segir að greiðslurnar til félaganna hafi verið notaðar til að greiða niður skuldir þeirra hjá Kaupþingi og Kaupthing Bank Luxembourg. Greiðslurnar hafi leitt til lækkunar á skuldum félaganna og þannig til auðgunar þeirra.

Hér má lesa dóminn í heild sinni.