Brotist inn í Grunnskóla Grindavíkur

Lögreglunni á Suðurnesjum barst í gær tilkynning um innbrot í Grunnskóla Grindavíkur og þjófnað á eigum golfklúbbs á Suðurnesjum.

Þegar lögreglumenn mættu á vettvang kom í ljós að sagaðar höfðu verið í sundur keðjur sem læstu álmu þar sem eru kennslurými og bókasafn. Ekki var séð í fljótu bragði að neinu hefði verið stolið og engin ummerki voru á skólabyggingunni sem bentu til innbrots.

Er helst talið að útidyrahurð hafi verið kviklæst og skemmdarvargarnir komist inn með þeim hætti. Málið er í rannsókn hjá lögreglu.

Þá var tilkynnt í gær að efni í skemmu í eigu golfklúbbs í sama umdæmi hefði verið stolið eins og það lagði sig. Um var að ræða einingar sem átti að fara að setja saman þegar þjófnaðurinn uppgötvaðist.

Upp komin hefði skemman verið sex metrar á breidd og þrjátíu metrar á lengd. Lögreglan segir ljóst að bæði hafi þurft búnað til að hífa einingarnar upp og einnig öflug flutningstæki til að flytja þær af vettvangi. Málið er í rannsókn.