KEA-skyrið yfirgefur Akureyri

Mjólkurbússtjóri MS á Akureyri segir stefnt að því að flytja framleiðslu á sýrðum vörum til útibúsins á Selfossi með vorinu. Þetta kemur fram á heimasíðu Vikublaðs Akureyrar.

Ástæða flutningsins er sú að skipa þarf út búnaði til ostagerðar á Akureyri. Til að koma nýjum og fullkomnum ostaframleiðslutækjum fyrir norðan heiða þarf að flytja sýrðu vöruna suður.

Kristín Halldórsdóttir, mjólkurbússtjóri MS á Akureyri, segir að skyrið ætti ekki að taka neinum breytingum þótt það verði framleitt á nýjum stað.

„Þar fyrir utan verður gamla skyrið, þetta hefðbunda óhrærða, áfram framleitt á Akureyri. Mysa sem fellur til við þá framleiðslu verður seld til súrsunar eins og verið hefur. Sú mysa sem tappað er á fernur og einnig seld í stærri einingum hangir á framleiðslu á óhrærðu skyri en ekki KEA skyri," segir Kristín við Vikublað Akureyrar.

Engar breytingar verða á mannahaldi hjá MS á Akureyri vegna hagræðingaraðgerðanna.

„„Hingað hefur verið flutt heil deild frá Selfossi sem framleiðir rjómaost, ostakökur, hrísmjólk, grjónagraut og smámál. Við hjá MS á Akureyri höfum undanfarið verið önnum kafin við að koma deildinni fyrir og framleiðsla hófst í kringum síðustu mánaðamót. Sú deild er nokkuð umfangsmikil svo það kemur ekki til uppsagna á starfsfólki þó KEA skyrið farið héðan," segir Kristín við Vikublað Akureyrar,