Tilkynnir ákvörðun sína í fyrramálið

Enn ríkir algjör óvissa um varaformannskjör hjá Vinstri grænum en landsfundur flokksins fer fram um helgina.

Árni Þór Sigurðsson og Björn Valur Gíslason eru þau tvö nöfn sem helst hafa verið nefnd til sögunnar. Björn Valur hló aðspurður hvort hann væri ekki kominn undan feldi.

„Ég mun senda frá mér yfirlýsingu í fyrramálið," sagði Björn Valur í samtali við fréttastofu Vísis í dag.

Steingrímur J. Sigfússon tilkynnti sem kunnugt er að hann myndi ekki gefa kost á sér til endurkjörs sem formaður flokksins. Katrín Jakobsdóttir, sem gegnt hefur stöðu varaformanns frá 2003, hefur tilkynnt formannsframboð. Að óbreyttu verður hún ein í kjöri.

Frestur til þess að skila framboðum rennur út klukkan tíu á föstudagskvöld. Kosning fer fram á landsfundinum á laugardag en reikna má með því að úrslit liggi fyrir um hádegi.

Ekki hefur náðst í Árna Þór Sigurðsson þrátt fyrir ítrekaðar tilraunir í dag.

Arndís Soffía Sigurðardóttir og Inga Sigrún Atladóttir hafa verið nefndar til sögunnar varðandi varaformannsframboð.

Í samtali við Vísi í dag neituðu þær báðar að framboð væri á döfinni.

„Nei, mér datt það ekki í hug,“ sagði Inga Sigrún Atladóttir í samtali við Vísi í dag. Árni Þór Sigurðsson og Björn Valur Gíslason hafa verið orðaðir við stöðuna og líst Ingu Sigrúnu ágætlega á að fá karlmann í embættið.

„Það væri gott þótt kynjahlutföll séu ekki aðalatriðið,“ sagði Inga Sigrún og sló á létta strengi. „Við Katrín erum líka á svipuðum aldri og lítum alveg eins út,“ sagði Inga Sigrún og hló.