Niðurstöðu úr sýnatöku MAST að vænta innan skamms

Enn eru ekki komnar niðurstöður úr sýnatöku Matvælastofnunar, en tekin voru sýni af innlendum kjötvörum á markaði í kjölfar hrossakjötsmálsins svokallaða.

Undanfarið hafa borist fregnir frá Evrópu af hrossakjötsblönduðum vörum sem sagðar eru innihalda nautakjöt, og meðal annars voru lasagne-réttir frá First Price innkallaðar úr verslunum Kaupáss í varúðarskyni.

Herdís M. Guðjónsdóttir hjá Matvælastofnun segir sýni hafa verið tekin og yfirlýsingar sé að vænta frá MAST innan skamms.

Lasagne-innkallanirnar séu hins vegar ekki á könnu Matvælastofnunar heldur innflutningsaðila vörunnar. Það sé á þeirra ábyrgð að innkalla vörur en Heilbrigðiseftirlitsins að fylgjast með að það sé gert. Matvælastofnun komi þó alltaf að málum er varða innköllun með því að samræma aðgerðir heilbrigðiseftirlitssvæðanna ef varan er á fleiri en einu svæði.