Alvogen kaupir rúmenskt lyfjafyrirtæki

Lyfjafyrirtækið Alvogen hefur keypt rúmenska samheitalyfjafyrirtækið Labormed. Kaupin eru mikilvægur áfangi fyrir uppbyggingu Alvogen í Mið- og Austur Evrópu en Labormed er eitt af stærstu samheitalyfjafyrirtækjum Rúmeníu. Starfsemi Alvogen nær nú til um 25 landa og starfsmenn félagsins eru 1700, þar af 400 í Rúmeníu og 20 á Íslandi. Alvogen gefur kaupverð fyrirtækisins ekki upp.

Í fréttatilkynningu vegna kaupanna segir að með þeim sé Alvogen að styrkja starfsemi sína í Mið- og Austur Evrópu en félagið sé nú þegar meðal annars með starfsemi í Ungverjalandi, Búlgaríu, Serbíu, Úkraínu, Rússlandi, Makedoníu, Póllandi, Króatíu og í Eystrasaltsríkjunum auk Bandaríkjanna og markaða í Asíu. Höfuðstöðvar Alvogen í Austur Evrópu verða í Rúmeníu þar sem félagið mun samþætta framleiðslu, þróun og markaðsmál fyrir svæðið. Markaðssetning Labormed verður undir merkjum Alvogen.

Alvogen er með starfsemi í Kópavogi og hefur ráðið til sín rúmlega 20 starfsmenn frá árinu 2010. Félagið byggir á traustum grunni Norwich Pharmaceuticals í Bandaríkjunum sem á sér 125 ára rekstrarsögu. Utan Bandaríkjanna hefur Alvogen byggt upp starfsemi sína í Austur Evrópu og Asíu og tilkynnti nýlega um kaup á einu stærsta samheitalyfjafyrirtæki í Suður-Kóreu. Alvogen vinnur með fjölda íslenskra fyrirtækja, bæði vegna útflutnings á ýmsum vörum og eins vegna kaupa á vörum og þjónustu vegna starfsemi félagsins hér á landi.