James færist nær ÍBV

Markvörðurinn David James hefur fengið sig lausan hjá enska C-deildarliðinu Bournemouth. Það stendur því ekkert í vegi fyrir því að hann gangi í raðir ÍBV hafi hann áhuga á því.

Hinn 42 ára gamli James var hér á landi á dögunum í boði Hermanns Hreiðarssonar, þjálfara ÍBV. Hermann vantar markvörð í liðið hjá sér og vill semja við James sem hann lék með á sínum tíma.

James var mjög jákvæður fyrir því að koma til Íslands í spjalli við íslenska fjölmiðla er hann var á landinu.