Ekki búið að taka ákvörðun hvort forsvarsmenn Eirar verði kærðir

„Það er búið að breyta skipulaginu, stjórn Eirar hefur samþykkt það og nú bíður það samþykktar hjá sýslumanninum á Sauðárkróki,“ segir Sigurður Rúnar Sigurjónsson, starfandi framkvæmdastjóri hjúkrunarheimilisins Eirar, en hann tók við starfinu eftir að gríðarleg fjárhagsvandræði félagsins voru afhjúpuð.

Í skýrslu Deloitte sem barst fjölmiðlum í dag er stjórnskipulag og stjórnarhættir heimilisins gagnrýnt harðlega.

Þannig var það talið vægast sagt óheppilegt að sami maður væri formaður fulltrúarráðs heimilisins og formaður stjórnar einnig. Þá var auki ekki talið eðlilegt að forstjóri sinnti starfi framkvæmdastjóra á sama tíma líkt og viðgekkst áður en félagið fór í greiðslustöðvun vegna gríðarlega hárra skulda.

Skýrsla Deloitte um Eir er svört. Þar kom meðal annars fram að forstjóri og fjármálastjóri félagsins hefðu eytt peningum úr svokölluðum þróunarsjóði, sem er í daglegu tali nefndur bleyjusjóður, í utanlandsferðir og uppihald.

Í skýrslunni kemur fram að í tíð fyrrverandi forstjóra heimilisins, Sigurðar Helga Guðmundssonar, hafi hann, auk fjármálastjórans og framkvæmdastjóra, eytt 2,7 milljónum króna í utanlandsferðir. Þá keypti Sigurður Helgi gjafabréf til útlanda og gaf tengdasyni sínum sem vann störf fyrir félagið á sínum tíma.

Í skýrslu Deloitte er fjallað sérstaklega um auðgunarbrot og umboðssvik án þess að því sé haldið fram að athafnir fyrri stjórnenda falli undir þær skilgreiningar.

Þegar Sigurður Rúnar er spurður beint út hvort það standi til að kæra fyrrverandi forsvarsmenn heimilisins til lögreglu vegna málsins, svarar hann: „Það er stjórnin sem tekur ákvörðun um framhald málsins.“

Stjórnin á ekki að koma saman fyrr en í ágúst, en að sögn Sigurðar Rúnars, er líklegt að stjórnin komi fyrr saman vegna skýrslunnar.

Eir er sjálfseignarstofnun en stofnaðilar eru meðal annars Reykjavíkurborg, Seltjarnarnes, ýmis stéttarfélög og lífeyrissjóðir.

Eir rekur meðal annars 173 hjúkrunarrými og 206 öryggisíbúðir, sem eru íbúðir með aðgang og nálægð við ýmsa þjónustu sem nýtist eldri borgurum.

Þrír stjórnarmenn úr Eir kærðu málið til sérstaks saksóknara í desember á síðasta ári. Samkvæmt upplýsingum frá embættinu er málið enn til meðferðar hjá embættinu.