Fjórir nýliðar fara með á HM á Spáni

Aron Kristjánsson valdi í gær þá fjórtán útileikmenn sem munu skipa hóp íslenska landsliðsins á HM á Spáni en fyrsti leikur strákanna okkar verður á móti Rússum á laugardaginn. Aron valdi fjóra nýliða í hópinn sinn því þeir Stefán Rafn Sigurmannsson, Fannar Þór Friðgeirsson, Ólafur Gústafsson og Arnór Þór Gunnarsson eru allir á leiðinni á sitt fyrsta stórmót.

Það eru liðin átta ár síðan það voru svona margir nýliðar á stórmóti en Viggó Sigurðsson var með sjö nýliða í hópnum sem fór til Túnis árið 2005.

„Þetta verður eldskírn fyrir þessa stráka og það eru líka margir leikmenn í stærri hlutverkum en þeir hafa áður verið í. Við erum með kjarna af leikmönnum sem hafa mikla reynslu og svo erum við líka með annan kjarna sem er mjög reynslulítill," segir Aron.

Viggó gaf mörgum lykilmönnum framtíðarinnar sitt fyrsta tækifæri á stórmóti í Túnis fyrir átta árum og nú er vonandi að leikmennirnir sem koma inn núna geti tekið að sér stór hlutverk í framtíðinni.

„Menn verða að vera tilbúnir þegar kallið kemur og það sem við stefnum að er að koma öllum inn í mótið í riðlakeppninni. Það er líka þannig að við erum með lykilleikmenn sem munu bera þungann af sóknarleiknum okkar. Svo verða aðrir að vera tilbúnir að koma með sitt inn í þetta," segir Aron.

Það sem þessi tvö stórmót, HM á Spáni 2013 og HM í Túnis 2005, eiga líka sameiginlegt er að bæði mótin eru fyrsta stórmót íslenska landsliðsins eftir langa þjálfaratíð Guðmundar Guðmundssonar. Guðmundur náði frábærum árangri með íslenska landsliðið, fyrst 2001 til 2004 og svo 2008 til 2012, en aðalgagnrýnin á hans störf var að treysta of mikið á of fáa leikmenn.

Aron hefur sýnt það í sínum fyrstu landsleikjum að hann notar liðið sitt og því má búast við að umræddir fjórtán leikmenn fái allir sitt tækifæri á Spáni. „Nú verða aðrir að taka við keflinu og sýna sig," segir Aron.

Nýliðarnir á HM á SpániStefán Rafn Sigurmannsson

Vinstri hornamaður hjá Rhein-Neckar Löwen

Lék með Haukum á Íslandi

22 ára (fæddur 9.05.1990)

196 sm og 96 kg

6 landsleikir og 5 mörk

Fannar Þór Friðgeirsson

Leikstjórnandi hjá Wetzlar

Lék með Val á Íslandi

25 ára (fæddur 03.06.1987)

181 sm og 85 kg

4 landsleikir og 4 mörk

Ólafur Gústafsson

Vinstri skytta hjá Flensburg

Lék með FH á Íslandi

23 ára (fæddur 27.03.1989)

196 sm og 95 kg

10 landsleikir og 26 mörk

Arnór Þór Gunnarsson

Hægri hornamaður hjá Die Bergische

Lék með Val á Íslandi

25 ára (fæddur 23.10.1987)

181 sm og 85 kg

16 landsleikir og 42 mörk

Nýliðar á síðustu stórmótum:ÓL 2012 - 0

EM 2012 - 2+1

Ólafur Bjarki Ragnarsson

Rúnar Kárason

*Aron Rafn Eðvarðsson

HM 2011 - 3

Kári Kristján Kristjánsson

Oddur Gretarsson

Sigurbergur Sveinsson

EM 2010 - 2

Aron Pálmarsson

Ólafur Andrés Guðmundsson

ÓL 2008 - 2

Björgvin Páll Gústavsson

Sturla Ásgeirsson

EM 2008 - 2

Bjarni Fritzson

Hannes Jón Jónsson

HM 2007 - 2

Markús Máni Michaelsson

Sverre Jakobsson

EM 2006 - 3+1

Heimir Örn Árnason

Sigurður Eggertsson

Þórir Ólafsson

*Vilhjálmur Halldórsson

HM 2005 - 7

Alexander Petersson

Arnór Atlason

Einar Hólmgeirsson

Hreiðar Levy Guðmundsson

Ingimundur Ingimundarson

Logi Geirsson

Vignir Svavarsson

* Kallaðir inn á miðju móti