Hætt við milljarðakröfur á Stoðir

Ríkisskattstjóri hefur ákveðið að endurákvarða ekki skatta á Stoðir, sem áður hét FL Group, vegna meintra vangreiðslna á tekjuskatt fyrir árið 2006. Á því ári hagnaðist félagið um 44,6 milljarða króna og því er ljóst að um margra milljarða króna endurgreiðslu hefði verið að ræða ef endurákvarðað hefði verið á Stoðir.

Með þessu er að mestu lokið skattrannsókn á Stoðum/FL Group sem hófst með húsleit í höfuðstöðvum félagsins 11. nóvember 2008. Ef allir angar málsins hefðu farið á versta veg fyrir Stoðir/FL Group hefði félagið þurft að greiða íslenska ríkinu 12,9 milljarða króna.

Snerist fyrst um rekstrarkostnað

Upphafleg rannsókn skattayfirvalda beindist að rekstrarkostnaði Stoða/FL Group á árinu 2007, en samkvæmt ársreikningi var hann 6,2 milljarðar króna. Þegar rannsókn skattrannsóknarstjóra lauk í desember 2010 sneri niðurstaðan ekki að rekstrarkostnaðinum, heldur meintum vangreiddum tekju- og virðisaukaskatti.

Tekjuskattshlutinn snýst um að félagið hafi ekki greitt tekjuskatt af hagnaði sínum árið 2006, þegar það hagnaðist um 44,6 milljarða króna. Virðisaukaskattshlutinn snerist síðan um að félagið skuldaði slíkan skatt, meðal annars vegna aðkeyptrar þjónustu af erlendum dótturfélögum sínum á árunum 2006 og 2007.

Stoðir/FL Group fengu endurskoðunarfyrirtækið KPMG til að meta hver möguleg áætluð skattaskuld félagsins gæti orðið ef öll málin færu á versta veg fyrir það. Niðurstaðan var sú að þá myndu Stoðir skulda skattayfirvöldum, og þar af leiðandi ríkissjóði, 12,9 milljarða króna. Langstærsti hluti þeirrar skuldar myndi skapast vegna tekjuskattshluta rannsóknarinnar.

Íslenska ríkið á í Stoðum

Í júní 2011 úrskurðaði Ríkisskattstjóri að Stoðir/FL Group skulduðu 741 milljón króna í virðisaukaskatt. Til að gera kröfuna upp gaf Stoðir/FL Group út nýtt hlutafé upp á 37 milljónir króna að nafnvirði og afhenti íslenska ríkinu. Ástæðan er sú að stjórn félagsins telur allar skattakröfur vera samningskröfur og því falli þær undir nauðasamning félagsins sem gerður var sumarið 2009. Samkvæmt honum eru allar óveðtryggðar kröfur gerðar upp með einnar milljónar króna eingreiðslu og að fimm prósent af viðbótarkröfunni fáist greidd með almennum hlutum í Stoðum/FL Group.

Ríkið hefur ekki fallist á þennan skilning Stoða/FL Group og því hefur félagið stefnt ríkinu fyrir dómstóla til að fá uppgjör sitt á kröfunni viðurkennt. Málið var tekið fyrir í gær.

Tekjuskattsmálinu lokið

Stoðum/FL Group barst hins vegar tilkynning frá Ríkisskattstjóra í lok síðasta árs um að tekjuskattshluta málsins væri lokið. Niðurstaða embættisins er sú að endurákvarða ekki skatta á félagið vegna þessa máls.

Í árshlutareikningi Stoða fyrir fyrstu sex mánuði ársins 2011, sem er síðasta birta uppgjör félagsins, er sérstaklega fjallað um skattrannsókn yfirvalda á félaginu. Þar segir að þar sem hagnaður Stoða hafi verið mikill árið 2006 gæti tekjuskattsrannsóknin haft umtalsverð fjárhagsleg áhrif á félagið. Helstu eignir Stoða eru 33,6 prósenta hlutur í TM, sem til stendur að selja í aðdraganda skráningar félagsins á markað á þessu ári, og 40,3 prósenta hlutur í drykkjarvöruframleiðandanum Refresco.