Sjö athafnir á 7.9.13

Það á sér ánægjuleg þróun stað fyrir fólk á Íslandi sem vill einfaldar, persónulegar og trúlausar athafnir fyrir tímamótin í lífi sínu. Veraldlegar athafnir byggðar á manngildinu einu saman færast nú talsvert í aukana og hefur fjöldi giftinga þrefaldast í ár hjá athafnarstjórum Siðmenntar og samt er árið ekki búið. Lauslega reiknað eru þetta orðin um tæp 10% af þeim giftingum sem áður voru hjá sýslumönnum ár hvert.

Um helgina verður met slegið þegar sjö athafnir fara fram á þeim skemmtilega degi 7-9-13. Ég óska pörunum hamingju og velfarnaðar. Félagið á nú á að skipa tólf lögformlegum athafnarstjórum sem hafa notið hylli þeirra sem hafa fengið þjónustu hjá þeim. Þá hafa nafngjafarathafnirnar sem oftast eru haldnar í heimahúsum notið vinsælda og var stökk í fjölda þeirra í fyrra. Engar játningar á lífsskoðunum fara fram í þessum athöfnum. Undirritaður hefur umsjón með athafnaþjónustu Siðmenntar og hefur það verið afar ánægjuleg reynsla að sjá prógrammið vaxa og dafna frá 2008.

Borgaralegum fermingum hjá félaginu hefur fjölgað talsvert og nú í lok ágúst höfðu tvöfalt fleiri skráð sig en á sama tíma í fyrra. Skráningu lýkur 30. nóvember og er útlit fyrir mikið stökk í þátttöku og enn eitt þátttökumetið. Fermingarnámskeiðin sem Jóhann Björnsson kennari stýrir hafa sannað gildi sitt gegnum árin og eru í stöðugri framþróun.

Þetta er 26. árið sem borgaraleg ferming fer fram og er hún að festa sig í sessi á Akureyri, Kópavogi og Fljótsdalshéraði utan Reykjavíkur.

Í nágrannalöndum okkar er sama þróun í gangi og þá sérstaklega í ört vaxandi fjölda veraldlegra og húmanískra giftinga. Skotar eru þar í fararbroddi og nálgast nú fjögur þúsund veraldlegar giftingar á ári hjá húmanistasamtökum þeirra og hafa þær farið fram úr vígslum bæði hjá sýslumönnum og kaþólskum prestum. Svipuð þróun á sér stað í Írlandi og svo er einnig mikið um veraldlegar athafnir í Noregi, Englandi, Hollandi, Belgíu og Frakklandi. Þjóðverjar, Danir, Svíar, Finnar og Bandaríkjamenn eru að komast vel af stað ásamt fleiri löndum.

Yngri kynslóðirnar í þessum löndum og Íslandi eru lítt móttækilegar fyrir trú á æðri mátt og hafa í vaxandi mæli að leiðarljósi siðferði byggt á manngildi og rökhugsun. Í þjóðarpúlsi Capacent Gallup hérlendis frá maí 2011 kom í ljós að 55% fólks 16-29 ára trúði ekki á „guð eða önnur æðri máttarvöld“ og 92% sama aldurshóps trúði því ekki að Guð hefði skapað heiminn.

Húmanismi er lífsskoðun sem fylgir þeirri reglu að það besta úr siðfræði samtímans og lærdómar af reynslu fortíðar skuli vísa veginn. Húmanisminn er framsækinn líkt og vísindin. Þar líðast ekki órökstuddar kreddur og þar ríkir samráð en ekki foringjaræði. Frelsi, mannúð, velvilji, mannvirðing og samábyrgð lýsa þann veg og aðeins við mennirnir berum ábyrgð á eigin gerðum. Góðvild er markmið húmanista vegna þess að hún hefur gildi í sjálfu sér en ekki vegna boðunar frá æðri mætti eða loforða um himnavist. Góðar stundir.