Stuðningsgrein: Guðbjart sem formann

Jóhanna Sigurðardóttir forsætisráðherra hefur ákveðið að draga sig í hlé frá stjórnmálum og því liggur fyrir jafnaðarmönnum að kjósa nýjan formann Samfylkingarinnar í allsherjaratkvæðagreiðslu. Jóhanna sóttist ekki eftir formennsku í flokknum eða stöðu forsætisráðherra heldur svaraði hún kalli og áskorunum félaga sinna á vordögum 2009.

Þegar við horfum til baka er full ástæða til þess að fyllast stolti yfir árangri ríkisstjórnar Jóhönnu. Hagur Íslendinga batnar nú hraðar en flestra annarra þjóða, kaupmáttur vex, dregið hefur úr atvinnuleysi og lífskjör þjóðarinnar fara batnandi. Félagslegt réttlæti og jafnrétti kynjanna mælist nú hvað mest á Íslandi í alþjóðlegum samanburði um leið og efnahagslegur jöfnuður hefur aukist á erfiðum tímum.

Ferðaþjónustan og aðrar vaxandi greinar mynda ásamt hefðbundnum grunnatvinnuvegum þá fjölbreyttu flóru atvinnulífs sem nauðsynleg er samfélögum sem vilja vaxa og dafna. Útflutningsgreinarnar hafa ekki síður lagt til þess góða hagvaxtar sem hér hefur verið á liðnum árum.

Ríkisstjórn Jóhönnu hefur haft að leiðarljósi stefnu jafnaðar og félagshyggju og það vil ég að næsti formaður hafi fyrst og fremst í forgrunni en ekki óljós loforð um breytingar.

Það hefur tekist að bjarga okkur frá gjaldþroti og rétta okkur við og nú er komið að því að sækja fram. Þá verðum við að velja okkur forystu sem vinnur eftir þeim gildum sem Samfylkingin hefur að leiðarljósi.

Guðbjartur Hannesson, sem hefur verið ráðherra í stjórn Jóhönnu, er rétti maðurinn til þess að halda á lofti stefnu Samfylkingarinnar um jafnrétti og félagshyggju og vera í fararbroddi þegar við byggjum upp til framtíðar.

Guðbjartur hefur orðið að taka ákvarðanir sem hafa orkað tvímælis í erfiðri stöðu til þess að hægt væri að ná fram nauðsynlegu markmiði um aðhald í rekstri sjúkrastofnana. Vel hefur tekist til í flestum tilfellum en hann var maður til þess að biðjast afsökunar og gangast við að ákvörðun hans í launamáli forstjóra Landspítala hefði verið röng.

Ég hef átt því láni að fagna að kynnast Guðbjarti persónulega þegar málefni eldri borgara hafa verið til umfjöllunar á fundum í ráðuneyti velferðar og víðar. Framkoma og málflutningur hans ætti að vera mörgum stjórnmálamönnum til eftirbreytni. Guðbjartur flytur mál sitt af sannfæringu án þess að viðhafa stór orð og er tilbúinn til þess að hlusta frekar en að tala án þess að hlusta. Það er eftirspurn eftir forystumönnum eins og Guðbjarti.