Blátt áfram, forvarnaverkefni

Fyrsta stigs forvörn er langtímaáætlun! Við sjáum nú áhrif fræðslunnar níu árum síðar.

Það var einu sinni laxveiðimaður sem stóð úti í miðri á og var að veiða. Allt í einu kemur einstaklingur fljótandi niður ána og berst um í straumnum og hrópar á hjálp. Veiðimaðurinn hendir frá sér veiðistönginni, stekkur út í og nær að bjarga manninum á land. Maðurinn þakkar fyrir sig og fer. Veiðimaðurinn tekur stöngina sína og fer aftur út í ána að veiða. Eftir stutta stund kemur unglingur fljótandi niður ána og hrópar og kallar á hjálp. Veiðimaðurinn stekkur til, hendir frá sér veiðistönginni og hjálpar unglingnum að komast á land. Þetta heldur áfram að gerast reglulega og í hvert sinn hjálpar veiðimaðurinn manneskjunni á land. Loks fer veiðimaðurinn að hugsa með sér:

„Hver vegna koma allir þessir einstaklingar fljótandi niður ána? Af hverju detta þeir í ána? Ég verð að komast að því hvað er að gerast þarna efst í ánni." Hann leggur frá sér veiðistöngina og gengur af stað.

Fyrsta stigs forvarnir

Fyrsta stigs forvörnin hefst efst í ánni þar sem fullorðnir vernda börn sem annars gætu dottið í ána. Að sjálfsögðu þurfum við á fólki að halda sem stendur með fram ánni og hjálpar þeim upp úr. Foreldra, kennara, sálfræðinga og félagsráðgjafa. En við megum ekki gleyma að horfa til fyrsta stigs forvarna sem leið til að koma í veg fyrir að börnin falli í ána. Það er starf sem Blátt áfram hefur nú sinnt í níu ár.

Fyrsta stigs forvarnir: Fræðsla, stefna stofnana og félaga sem starfa með börnum og unglingum; reglur um vinnubrögð sem settar eru til að fyrirbyggja að kynferðisofbeldi geti átt sér stað.

Upplýsingar um fræðslu Blátt áfram fyrir fullorðna, börn og unglinga eru á vefsíðu félagsins, www.blattafram.is.