Skrautsylgja Snorra sennilega komin í leitirnar

Skrautsylgja Snorra Sturlusonar er mögulega fundin ofan við Húsafell. Þetta kemur fram í Skessuhorni í dag.

Þannig er að göngufólk fann í sumar, í moldarbarði, aldagamla sylgju ofan við bæjarhúsin í Húsafelli í Borgarfirði. Hún telst vel varðveitt miðað við aldur en í fyrstu töldu fornleifafræðingar sylgjuna frá 15. eða 16. öld en nú eru uppi kenningar um að hún geti verið minnst hundrað árum eldri eða frá tímabilinu 1250 til 1400.

Fái það staðist má vel vera að þarna sé komin sjálf skrautsylgja Snorra Sturlusonar. Sylgjuna bar Snorri um háls sér eins og áhugamenn um Snorra þekkja en hún er dregin fram á styttunni sem Gustaf Vigeland gerði af honum og stendur í Reykholti. Eins og Skessuhornsmenn orða það: "Hafi hún eðli málsins samkvæmt fallið af þegar Snorri varð höfðinu styttri þegar menn Gissurar Þorvaldssonar gerðu innrásina í Reykholt 1262."