"Ekki geðþóttaákvörðun ráðherra“

Heilbrigðisráðherra segir það ekki vera og að það eigi ekki að vera geðþóttaákvörðun ráðherra hversu mikla aðstoð fatlaðir einstaklingar fá frá ríki og sveitarfélögum. Hann segir það rangt að hann hafi brotið á mannréttindum sex ára fatlaðs drengs.

Kristján Þór Júlíusson heilbrigðisráðherra segir það ekki rétt að hann hafi neitað foreldrum Ragnars Emils Hallgrímssonar, sex ára drengs með hrörnunarsjúkdóminn SMA, um fjárveitingu til að halda úti hjúkrunarfræðingi sem fylgir honum til skóla, en þetta fullyrti móðir drengsins í fréttum okkar á sunnudaginn var. Hún sagðist einnig ætla að stefna íslenska ríkinu vegna þessa.

Samkvæmt upplýsingum frá móður Ragnars fá þau hjónin í kringum þrjár milljónir á mánuði frá ríkinu og sveitarfélaginu sem þau búa í til að annast drenginn sinn. Kristján segir að það verði að hafa í huga að fleiri börn eru í erfiðri stöðu líkt og Ragnar og hans fjölskylda. „Það er að mörgu að hyggja í þessum efnum og við mat á þeirri þjónustu sem þarf að veita langveikum börnum og fötluðum einstaklingum þá verður ráðherra hverju sinni að reiða sig á hið besta og faglegasta mat frá fagfólki hverju sinni,“ segir hann.

Freyja Haraldsdóttir, varaþingmaður og framkvæmdastjóri NPA miðstöðvarinnar, sagði í fréttum okkar í fyrrakvöld Kristján Þór vera að brjóta á mannréttindum drengsins. Ráðherrann segir svo ekki vera. „Ráðuneytið á að móta stefnu í þessum efnum og síðan er það fagaðila að ákveða magnið í þjónstunni og það liggur fyrir að á fjárlögum ársins 2013 er eytt ákveðnum fjármunum til þessa verkefna og innan þess ramma verðum við að vinna á þessu ári,“ segir hann.