Sjónvarps- og útvarpssendingar frá Úlfarsfelli

Þann 1. maí birtist grein í Fréttablaðinu eftir Þórdísi Hauksdóttur, þar sem hún fjallaði um uppsetningu fjarskiptamannvirkja á Úlfarsfelli. Í greininni var uppsetningin og tengdar framkvæmdir gagnrýndar harkalega, en með þessum línum vill Vodafone skýra tilurð framkvæmdanna og sögulegt samhengi þeirra.

Alvarleg röskun á mikilvægri þjónustu yfirvofandi

Um áratuga skeið var rekin á Rjúpnahæð í Kópavogi fjarskiptastöð, þaðan sem og útvarpssendingar voru til stórs hluta höfuðborgarsvæðisins. Stöðin var lögð niður fyrir rúmum fimm árum, vegna byggingar nýrra íbúðahverfa á svæðinu. Þá átti að hraða uppbyggingu á aðstöðu til útvarpssendinga á nýjum stað, en sú vinna tafðist úr hófi og útvarpssendingar lentu á hrakhólum. Fyrir vikið hafa gæði útvarpssendinga minnkað og þjónustan við borgarbúa versnað, eins og vaxandi umkvartanir almennings eru til vitnis um. Vegna byggðaþróunar munu útvarps- og sjónvarpssendingar frá Vatnsendahæð einnig leggjast af innan skamms og án uppbyggingar á nýjum útsendingarstað blasti því við alvarleg röskun á fjarskiptaþjónustu sem bæði er nauðsynleg út frá öryggissjónarmiðum og kröfu almennings um gæði útvarps- og sjónvarpsþjónustu.

Í því samhengi hófst fyrir nokkrum árum kortlagning á mögulegum sendastöðum á höfuðborgarsvæðinu. Niðurstaða þeirrar vinnu var sú, að Úlfarsfell væri langheppilegasti staðurinn til útvarpssendinga. Þaðan gætu fjarskiptamerki borist víða, án þess þó að umrædd mannvirki væru nærri byggð. Sótt var um leyfi fyrir nauðsynlegum framkvæmdum og eftir að leyfi fékkst, um einu og hálfu ári síðar, var hafist handa við lagningu jarðstrengs og byggingu tækjahúss. Þá voru settir upp tveir tréstaurar fyrir loftnet útvarpssendanna.

Rík áhersla var lögð á lágmarksrask á umhverfinu við framkvæmdirnar. Sannarlega sá þeirra merki á framkvæmdatímanum en nú, u.þ.b. ári síðar, eru ummerkin lítil sem engin. Farið var í einu og öllu eftir settum skilmálum en eftir að framkvæmdum lauk kom í ljós, að Reykjavíkurborg var óheimilt að veita byggingarleyfið sem síðar var afturkallað. Málinu var í framhaldinu vísað til kærunefndar Umhverfis og auðlindamála, sem hefur það til úrvinnslu þegar þessi orð eru rituð.

Úlfarsfell geti áfram verið útivistarparadís

Uppbygging fjarskiptaþjónustu er mikilvæg samfélaginu öllu. Miklar kröfur eru gerðar til þjónustuaðila og til að verða við þeim er óhjákvæmilegt að setja upp fjarskiptabúnað af ýmsu tagi, oft á óbyggðum svæðum. Þannig hefur tekist að bæta þjónustu við almenning, auka öryggi ferðafólks og mæta vaxandi eftirspurn. Í öllum framkvæmdum leggjum við okkur fram um að umgangast náttúruna af virðingu og hlusta fordómalaust á skoðanir þeirra sem gagnrýna einstakar framkvæmdir á okkar vegum. Við teljum okkur ekki vera óvini náttúrunnar og trúum því einlæglega, að fjarskiptarekstur á Úlfarsfelli hafi hvorki áhrif á lífræna heild fjallsins né hindri borgarbúa í að sækja þangað til útivistar.

Vinnum saman

Starfsmenn Vodafone er reiðubúnir til að vinna með öllum sem hagsmuna eiga að gæta að viðunandi lausn á málinu. Það er okkar trú að eitt þurfi ekki að útiloka annað og með góðri samvinnu geti Úlfarsfell í senn orðið varanlegur útsendingarstaður og útivistarparadís.