Guðmundur situr líklega hjá - "hef áður verið á gula takkanum"

Sjálfstæðismenn styðja vantraustsstillögu Þórs Saari, þingmanns Hreyfingarinnar, sem hann lagði fram í dag og verður tekin fyrir á þriðjudag á Alþingi. Guðmundur Steingrímsson, þingmaður Bjartrar framtíðar, segir líklegt að hann muni sitja hjá.

Guðmundur segir í samtali við fréttastofu að hann ætli að ræða betur tillöguna við fólkið sem er með sér í Bjartri framtíð. „Og sjá hvað þeim finnst um tillöguna. Ég hef setið hjá áður þegar það kom vantrauststillaga fram, þá var ég á gula takkanum. Það er kannski vísbending - og ekkert ólíklegt að ég geri það aftur," segir hann.

„Sjálfstæðisflokkurinn styður vantraust á ríkisstjórnina, meginatriðið er að láta reyna á það hvort að ríkisstjórnin nýtur meirihluta stuðnings á þinginu eða ekki. Hitt er síðan þarf að hugleiða, með hvaða hætti skipuð yrði starfsstjórn og hvert hlutverk hennar ætti að vera og eins hvenær væri þá rétt að boða til kosninga - ég hef svo sem ekki gert það alveg upp við mig en aðalatriðið er að við styðjum vantraustið," segir Bjarni Benediktsson, formaður Sjálfstæðisflokksins.

Ekki náðist í Sigmund Davíð Gunnlaugsson, formann Framsóknarflokksins, við vinnslu fréttarinnar.