Kynferðisbrotið á Ísafirði: "Erfitt að hugsa til þess að svona menn gangi lausir"

Ekki hefur verið farið fram á gæsluvarðhald yfir fimm mönnum sem handteknir voru á Ísafirði í gærmorgun, grunaðir um kynferðisbrot gagnvart ungri stúlku í bænum. Þeir ganga því lausir.

Mönnunum var sleppt að loknum yfirheyrslum enda getur lögreglan aðeins haldið fólki í sólarhring án gæsluvarðhaldskröfu. Mennirnir ganga því lausir en tveir hafa ennþá réttarstöðu sakborninga og hafa verið úrskurðaðir í farbann til sautjánda febrúar. Ung kona var flutt til skoðunar á Heilbrigðisstofnun Vestfjarða eftir að tilkynnt var um brotið en var útskrifuð þaðan í gær.

Mennirnir eru allir af erlendu bergi brotnir en samkvæmt upplýsingum fréttastofu er stúlkan íslensk og um tvítugt. Lögreglan verst allra frétta og mjög erfitt hefur verið að nálgast upplýsingar um málið, en eftir því sem við komumst næst voru mennirnir stöðvaðir í miðjum klíðum við brot sitt þegar vinkona konunnar kom á vettvang.

Harpa Oddbjörnsdóttir, starfskona Sólstafa, sem eru eins konar systursamtök Stígamóta á Ísafirði, segir árásina mikið áfall. „Þetta er rosalegt brot, eins og öll brot en þetta er áfall, fólk er í áfalli hérna,“ segir Harpa.

Hún segir tíðindi dagsins setja óhug að bæjarbúum. „Það er náttúrlega alltaf erfitt að hugsa til þess að svona menn gangi lausir. Ég veit að tveir þeirra hafa verið settir í farbann en þeir eru allir lausir úr gæsluvarðhaldi og það er auðvitað óþægileg tilhugsun að vita af þeim hérna í bænum.“

Hún segir hug bæjarbúa hjá konunni sem brotið hafi verið gegn. Hún veit ekki til þess að haft hafi verið samband við Sólstafi vegna málsins. „En ég vona að það komist til hennar einhvern veginn að ég held að allir bæjarbúar séu að hugsa til hennar. Að það sé fólk sem standi á bakvið hana.“