Kærir myndbandið og fordæmir umfjöllun

Guðmundur Örn Jóhannsson, framkvæmdastjóri Landsbjargar, fordæmir umfjöllun fjölmiðla um myndband sem Bóas Ragnar Bóasson setti á netið þar sem fram koma samskipti þeirra tveggja þar sem þeir ræða um það hvernig skuli brjóta lög um gjaldeyrishöft.

Hann hefur einnig kært myndbandið til lögreglu en hann segir samtalið vera tilklippt og framsetning villandi.

Svo segir hann orðrétt: „Undirritaður hefur sent kæru til lögreglu þar sem óskað er eftir rannsókn á myndbandagerð, dreifingu þess og birtingu, þ.m.t. birtingu fjölmiðla, þar sem vegið er að æru og trúverðugleika undirritaðs sem og þeirra samtaka sem hann hefur starfað fyrir. Kann þetta að brjóta í bága við almenn hegningalög. Hefur forsvarsmönnum fjölmiðla sömuleiðis verið sent bréf af sama tilefni . Fordæmir undirritaður óábyrgan fréttaflutning og mun skoða réttastöðu sína gagnvart fjölmiðlum sérstaklega."

Þá segir Guðmundur einnig að hann hafi tapað a´viðskiptum við þann sem setti myndbandið inn á vefinn, og hann kallar óheillamann. Vísir ræddi við umræddan mann í dag, Bóas Ragnar, þar sem hann sagðist hafa sett myndbandið á netið þar sem honum hafi verið ógnað af handrukkurum.

Þar var Bóas einnig spurður hvort Guðmundur hefði tapað fé í viðskiptum sínum við hann, því neitaði Bóas. Guðmundur heldur öðru fram.

Hér fyrir neðan má lesa yfirlýsingu Guðmundar í heild sinni:

Í tilefni af fréttaflutningi sl. sólarhring af „meintu misferli" undirritaðs með vísan til ónafngreinds myndbands þar sem undirritaður er settur í aðalhlutverk glæpamanns sem framkvæmdastjóri Slysavarnarfélagsins Landsbjargar, með afbökun, tilklipptum samtölum, textainnskotum og villandi framsetningu, vill undirritaður gefa eftirfarandi yfirlýsingu.

Undirritaður hefur sent kæru til lögreglu þar sem óskað er eftir rannsókn á myndbandagerð, dreifingu þess og birtingu, þ.m.t. birtingu fjölmiðla, þar sem vegið er að æru og trúverðugleika undirritaðs sem og þeirra samtaka sem hann hefur starfað fyrir. Kann þetta að brjóta í bága við almenn hegningalög. Hefur forsvarsmönnum fjölmiðla sömuleiðis verið sent bréf af sama tilefni . Fordæmir undirritaður óábyrgan fréttaflutning og mun skoða réttastöðu sína gagnvart fjölmiðlum sérstaklega.

Undirritaður hefur ekki á nokkurn hátt gerst brotlegur gagnvart Slysavarnarfélaginu Landsbjörgu sem undirritaður harmar að séu dregin inn í fréttaflutning þennan.

Undirritaður telur líkur benda til að hinn ónefndi framleiðandi myndbands sé óheilla maður sem hefur verið kærður til lögreglu vegna umfangsmikilla svika í viðskiptum við aðila á Íslandi og erlendis. Er undirritaður einn þeirra sem tapaði fjármunum vegna lána til fyrirtækja honum tengdum.

Undirritaður hefur komið þeim skilaboðum til embættis lögreglu sem fer með rannsókn málsins að hann liðsinni með hverjum þeim hætti sem hann á kost á.

Reykjavík, 31. október 2012. Guðmundur Örn Jóhannsson