Ríkisendurskoðandi taldi skýrsluna aðeins hafa sögulegt gildi

Sífelldar breytingar á mannhaldi, aðkallandi verkefni eftir hrunið 2008 og að lokum vangaveltur um hvort of langur tími væri liðinn frá því að því kerfið var keypt er meðal þess sem olli drættinum á úttekt Ríkisendurskoðunar á Oracle-kerfinu svonefnda. Þetta kemur fram í minnisblaði Ríkisendurskoðanda sem rætt var í forsætisnefnd Alþingis í dag.

Í minnisblaðinu rekur ríkisendurskoðandi, Sveinn Arason, ferlið allt og skýrir hinn mikla drátt á úttektinni á kaupum ríkisins á fjárhags- og mannauðskerfi (Oracle) á árinu 2001. Kastljósið gerði dráttinn að umfjöllunarefni á dögunum.

Nýir starfsmenn

Óskað var eftir úttektinni árið 2004. Til að vinna að úttektinni þurfti sérfræðing á sviði upplýsingamála. Á þeim tíma var aðeins einn slíkur sérfræðingur í vinnu hjá Ríkisendurskoðun. Sá starfsmaður var frá vinnu vegna veikinda á árunum 2004 og 2005 og því tafðist vinnan.

Á árinu 2005 voru tveir nýir kerfisfræðingar ráðnir til starfa hjá Ríkisendurskoðun. Í stað þess að ráðast í úttekt á fjárhags- og mannauðskerfi (Oracle) byrjuðu þeir á smærri verkefnum. Þegar þeir fóru að rýna í Oracle óskaði Fjársýsla ríkisins eftir að hægt yrði á vinnunni vegna anna. Kerfisfræðingarnir hættu svo hjá stofnuninni á árinu 2006 og því skorti starfsfólk til að vinna að verkefninu sem tafðist því meira.

Einnig taldi Ríkisendurskoðun rétt að bíða með úttektina og skýrslugerðina þar til innleiðingu kerfisins væri lokið, enda ekki sanngjarnt að taka út ófullbúið kerfi.

Árið 2007 var að nýju ráðinn kerfisfræðingur að stofnuninni. Þá hófst vinna við skýrsluna að krafti og fyrstu drög lágu fyrir árið 2008, fjórum árum eftir að óskað var eftir úttektinni. Þáverandi ríkisendurskoðandi var hins vegar ekki ánægður með drögin og ákvað að láta skoða ýmsa þætti málsins nánar.

Enginn feluleikur

Í ársskýrslu Ríkisendurskoðunar árið 2007 sem dreift var á Alþingi var fjallað um skýrsluna og útgáfa hennar boðuð á fyrri hluta árs 2008.

„Með ofangreinda umfjöllun í huga má öllum ver ljóst að það er bersýnilega bæði rangt og ósanngjarnt að fullyrða að stofnunin hafi á einhvern hátt reynt að leyna því að unnið væri að skýrslu um verkefnið," segir í minnisblaði Ríkisendurskoðanda.

Efnahagshrun

Við hrun bankanna árið 2008 riðluðust allar starfsáætlanir stofnunarinnar og helstu sérfræðingar hennar á sviði fjárhagsendurskoðunar sneru sér að verkefnum sem tengdust hruninu. Ekki var talið réttlætanlegt við þær aðstæður að leggja áherslu á skýrsluna um Oracle.

Núverandi ríkisendurskoðandi, Sveinn Arason, kynnti sér skýrsludrögin sem lágu fyrir og ákvað að rétt væri að stytta þau og gera hnitmiðaðari. Tövlunarfræðingur sem hafði starfað hjá Ríkisendurskoðun frá árinu 2007 var settur í það verkefni. Drög að skýrslu lágu fyrir síðla árs 2009, en það voru drögin sem Kastljós studdist við í umfjöllun sinni.

Ríkisendurskoðandi var ekki sáttur við drögin, enda virtust ályktanir og niðurstöður í hróplegu ósamræmi við fyrirliggjandi gögn og skýringar.

Aðeins sögulegt plagg

Þegar hér var komið við sögu var árið 2010 og 9 ár liðin frá kaupum á kerfinu. Ríkisendurskoðandi taldi því að skýrslan um undirbúning og innleiðingu Oracle yrði aðeins sögulegt plagg. „Að mínu mati var mjög ólíklegt að stjórnvöld myndu telja það forgangsmál að kaupa nýtt bókhaldskerfi fyrir ríkið," segir Sveinn.

Því var ákveðið að hinkra um sinn en í maí 2011 var tölvunarfræðingur hjá Ríkisendurskoðun settur í að skrifa skýrslu um innleiðingu og kostnað af kerfinu. Á sama tíma hafði hann önnur viðamikil verkefni á sinni könnu. Því gekk skýrslugerðin ekki hratt. Skýrslan er enn ekki tilbúin en umræddur tölvunarfræðingur hætti hjá stofnuninni á þessu ári.

Nú hefur stjórnsýslusviði Ríkisendurskoðunar verið falið að klára skýrsluna sem valdið hefur miklu fjaðrafoki.