Snorri: Ég verð með

Snorri Steinn Guðjónsson er enn að glíma við sinaskeiðabólgu sem hefur haldið honum á hliðarlínunni undanfarna daga. Hann segist þó ætla að vera með í fyrsta leik Íslands á Ólympíuleikunum.

Landsliðið æfði snemma í morgun en fyrst leikur liðsins á leikunum verður gegn Argentínu á sunnudagsmorgun.

Snorri gat ekki æft með liðinu í dag, frekar en síðustu daga. Hann hefur verið að glíma við sinaskeiðabólgu í vinstri hendi. Slæmu fréttirnar eru þær að hann er einnig kominn með bólgu í hægri höndina, sem er öllu verra.

„Það gengur upp og ofan hjá mér. Ég vil kannski tala sem minnst um það," sagði Snorri en viðtalið má sjá í heild sinni hér fyrir ofan. „En það er engin dramatík í þessu ennþá."

Spurður hvort hann telji að hann verði með á sunnudaginn var svarið ákveðið: „Ég verð með."

„En annars er gott að vera kominn og ljóminn er að fara af þessu. Menn eru hættir að góna út í loftið í tíma og ótíma og vonandi hægt að fara að einbeita sér að leiknum á sunnudaginn."

„Við trúum því að við verðum klárir á sunnudaginn og farið að kitla verulega í að byrja."