Heimir: Erum risaeðlur þegar kemur að bjórsölu á vellinum

Heimir Hallgrímsson, aðstoðarlandsliðsþjálfari í knattspyrnu, segir að mikið sé í það lagt að búa til góða umgjörð og stemningu í kringum íslenska karlalandsliðið í knattspyrnu.

Þá stemningu hefur sárlega vantað síðustu ár. Reyndar hefur ansi oft líka vantað stemningu í leikmenn sem hefur ekki hjálpað til við að rífa upp stemninguna í stúkunni.

Búið er að endurvekja stuðningsmannasveit landsliðsins sem er fyrsta skref í átt til betri tíma og betri stemningar.

"Við vildum fá aðstoð frá fólkinu og erum þakklátir fyrir að það sé búið að endurvekja stuðningsmannasveitina. Við viljum að leikurinn verði ánægjulegur fyrir þá sem mæta á völlinn svo það fólk komi aftur," sagði Heimir en hann segir að það vanti ekki bara stemningu á leiki landsliðsins.

"Þetta vantar á Íslandi almennt. Það þarf að búa til menningu í kringum boltann hérna heima og við gerum það í rólegheitum. Við vitum að það koma ekki 100 þúsund manns á Færeyjaleikinn á miðvikudag en við munum gera okkar besta fyrir þá sem koma."

Umræðan um hvort það eigi að selja bjór á vellinum er ekki ný af nálinni og Heimir segir að Ísland sé sér á báti í þeim málum.

"Ég veit ekki hvort það er hættulegt að segja það en við erum smá risaeðlur í þessum málum. Þetta er leyft alls staðar annars staðar í heiminum en virðist vera voðalega erfitt á Íslandi."

Áfengisveitingar hafa þó verið í boði á Laugardalsvelli undanfarin ár en aðeins fyrir útvalda í VIP-stúku vallarins.